Meta jasandy ıntellekt kómegimen balalardyń paraqshalaryn buǵattaı bastaıdy
ASTANA. KAZINFORM – Instagram men Facebook 13 jasqa tolmaǵan balalardyń akkaýnttaryn jasandy ıntellekt arqyly anyqtap, buǵattamaq, dep habarlaıdy DW.
Meta kompanııasy ıelik etetin áleýmettik jelilerde jasandy ıntellekt endi profılderdi tolyq kólemde ári konteksti eskere otyryp taldaıtyn bolady.
Balalardyń naqty jasyn anyqtaýǵa kómektesetin aqparat jazba, pikir jáne fotosýret sıpattamalarynan izdeledi.
Sonymen qatar Meta AI baǵdarlamasy yqtımal zańbuzýdy anyqtaý kezinde fotodaǵy adamdardyń boıy men súıek qurylymyn da esepke almaq. Keıbir sarapshylar mundaı tásildi «jeke ómirge shamadan tys aralasý» dep baǵalap otyr.
— Jastardyń bet-pishini parametrleri men minez-qulqy týraly derekterdi shamadan tys jınap, óńdeý arqyly olardyń qaýipsizdigin qamtamasyz etýge bolady deý — qate túsinik. Іs júzinde bul jarnama úshin rastalǵan nysandar tizimin jasaýǵa alyp keledi, — dedi Endı Pshıbylskı.
Al Nına Kollek Meta aldymen aýqymdy derekter profılin qalyptastyrýy qajet ekenin aıtty.
— Jasandy ıntellekt baǵdarlamalary jas pen minez-qulyq týraly qorytyndy jasaý úshin derekter negizinde úırenýi kerek, — dep túsindirdi ol.
Meta kompanııasynyń baspasóz hatshysy DW-ge kompanııa 13 jasqa tolmaǵan balalardyń derekterin jasandy ıntellektini oqytý úshin paıdalanbaıtynyn, kerisinshe óshiretinin málimdedi.
Eger jasandy ıntellekt algorıtmi qoldanýshynyń 13 jasqa tolmaǵanyn anyqtaıtyn belgiler tapsa, onyń paraqshasy ýaqytsha buǵattalady. Al paıdalanýshy óziniń jasy úlken ekenin dáleldeı almasa, akkaýnty jáne onymen baılanysty barlyq derek joıylady, dep habarlady kompanııa.
Aıta ketelik balalarǵa áleýmettik jelilerge tyıym salatyn normalar Quryltaıda qaralady.
