Meta Ray-Ban Display kózildiriginiń satylymyn álem boıynsha ýaqytsha toqtatty

ASTANA. KAZINFORM — Meta kompanııasy Ray-Ban Display kózildiriginiń jahandyq satylymyn ýaqytsha toqtatqanyn málimdedi. Buǵan AQSh-taǵy suranystyń óte joǵary bolýy jáne ónim kóleminiń shekteýligi sebep bolǵan. Bul týraly Reuters agenttigi habarlady.

Bastapqyda qurylǵynyń satylymyn osy jyldyń basynda Ulybrıtanııada, Frantsııada, Italııada jáne Kanadada bastaý josparlanǵan eken. Bul sheshim aldyńǵy nusqalardyń naryqta sátti iske qosylýynan keıin qabyldanǵan edi. Alaıda qazir kompanııa amerıkalyq tutynýshylardyń tapsyrystaryn oryndaýǵa basymdyq berip, ónimniń halyqaralyq naryqtaǵy qoljetimdiligin qamtamasyz etý strategııasyn qaıta qaraýdy jón kórdi.

Meta ókilderiniń aıtýynsha, bul kózildirik «óz sanatyndaǵy alǵashqy ónim» sanalady, al ony satyp alýǵa arnalǵan kútý tizimi aıtarlyqtaı uzaryp ketken.

Atap ótilgendeı, Ray-Ban Display kózildirigi paıdalanýshylarǵa foto túsirýge, kontentti tikeleı efırde taratýǵa jáne jasandy ıntellekt kómekshisimen ózara árekettesýge múmkindik beredi. IDC EMEA derekterine sáıkes, satylymnyń alǵashqy toqsanynda Meta 15 myń dana Ray-Ban Display kózildirigin satyp, aqyldy kózildirik segmentindegi naryqtyń 6 paıyzyn ıelengen.

Sondaı-aq Las-Vegasta ótken jyl saıynǵy tutynýshylyq elektronıka kórmesinde (CES) kompanııa kózildirikke jáne Meta Neural Band bilezigine arnalǵan jańa fýnktsııalardy tanystyrdy. Jańartýlardyń qatarynda telesýfler fýnktsııasy bar — ol paıdalanýshylarǵa jazbalardy oqýǵa jáne mátindi bilezik arqyly basqarý arqyly aınaldyrýǵa múmkindik beredi.

Eske sala ketsek, Meta adamnyń jasyn tekserý júıesin engizetinin habarlady. 

Sondaı-aq Meta Facebook-tiń densaýlyqqa tıgizetin teris áseri jónindegi tól zertteýin jasyrǵanyn da jazdyq.