Meta-nyń smart kózildirikterindegi bet-álpetti taný fýnktsııasyna qarsylyq jıiledi
ASTANA. KAZINFORM – 75 quqyq qorǵaý uıymynan quralǵan koalıtsııa Meta kompanııasyn Ray-Ban smart glasses jáne Oakley smart glasses qurylǵylaryna bet-álpetti taný fýnktsııasyn engizýden bas tartýǵa shaqyrdy.
Koalıtsııa quramyna American Civil Liberties Union, Electronic Privacy Information Center, Access Now jáne basqa da uıymdar kirgen.
Olar Mark Tsýkerberg atyna joldaǵan úndeýde Name Tag dep atalatyn fýnktsııany ázirleýdi toqtatýdy talap etti. Bul fýnktsııa jasandy ıntellekt negizinde paıdalanýshynyń kórý aımaǵyndaǵy adamdardy avtomatty túrde tanýǵa múmkindik beredi.
Quqyq qorǵaýshylardyń aıtýynsha, mundaı tehnologııadan qorǵaný is júzinde múmkin emes, óıtkeni qoǵamdyq oryndarda kez kelgen adamdy skanerleýge bolady.
Olar bul fýnktsııanyń yqtımal qaýipterine nazar aýdaryp, ony qaskóıler saıası belsendilerdi, memlekettik qyzmetkerlerdi jáne qarapaıym azamattardy ańdý úshin paıdalanýy múmkin ekenin atap ótti.
– Bul tehnologııany qoldanatyn stalkerler men alaıaqtar adamnyń tek aty-jónin ǵana emes, onyń mekenjaıyn, otbasylyq jaǵdaıyn, áleýmettik jelidegi paraqshalaryn, jumys ornyn, tabysyn, hobbıin, densaýlyq jaǵdaıyn jáne ádetterin de ońaı anyqtaı alady. Munyń ózi alańdatarlyq jaǵdaı, – delingen málimdemede.
Uıymdar Meta kompanııasyna bet-álpetti taný fýnktsııalaryn engizýden tolyq bas tartýdy, sondaı-aq tehnologııalardyń zańsyz qoldanylý jaǵdaılary týraly ashyq aqparat berýdi talap etti.
Sonymen qatar, quqyq qorǵaýshylar bıometrııalyq sheshimderdi engizer aldynda táýelsiz sarapshylardy tartýǵa shaqyrdy.
Buǵan deıin Meta joǵary suranysqa baılanysty Ray-Ban Display smart kózildirikterin álem boıynsha satýdy ýaqytsha toqtatqan bolatyn. Bul qurylǵylar foto túsirýge, kontentti tikeleı efırde taratýǵa jáne jasandy ıntellekt kómekshisimen ózara árekettesýge múmkindik beredi.
Aıta keteıik, sot Meta men YouTube-ty jasóspirimge ótemaqy tóleýge mindettedi.
