Meta men «Qazaqstannyń avtorlyq qoǵamy» shartqa qol qoıdy
ASTANA. KAZINFORM – Meta men «Qazaqstannyń avtorlyq qoǵamy» RQB Instagram jáne Facebook platformalarynda qazaqstandyq mýzykany paıdalaný máselesin retteıtin shartqa qol qoıdy. Bul týraly Ádilet mınıstrligi Zııatkerlik menshik komıtetiniń tóraǵasy Sholpan Ábdireeva aıtty.
- Ózderińiz biletindeı, ótken qarashada kóptegen áleýmettik jeli qoldanýshylary otandyq avtorlardyń mýzykasy osy platformalardan joǵalyp ketkenin baıqady. Shekteýler avtorlyq quqyqty saqtaý qajettiliginen týyndaǵan edi. Halyqaralyq jáne ulttyq zańnama avtorlarmen tikeleı nemese olardyń múddelerin bildiretin uıymdarmen sharttardyń bolýyn talap etedi. Mundaı kelisimsiz mýzykany tsıfrlyq platformalarda paıdalaný múmkin emes jáne Qazaqstan Respýblıkasynyń zańnamasynda kózdelgen jaýapkershilikke ákep soǵady. Osylaısha, lıtsenzııalyq kelisimderdiń qoldanylý merziminiń aıaqtalýy qazaqstandyq mýzykalyq shyǵarmalardyń qoljetimdiligin ýaqytsha shekteýge alyp keldi, - dedi ol Ortalyq kommýnıkatsııalar qyzmetindegi brıfıngte.
Onyń atap ótýinshe, Mádenıet jáne aqparat mınıstrliginiń qatysýymen sheteldik seriktestermen jáne qazaqstandyq ujymdyq uıymdarmen mýzykany qaıtarý boıynsha kelissózder júrgizildi. Ádilet mınıstrligi Meta platformasy men ujymdyq quqyqtardy basqarý uıymy arasyndaǵy baılanys qyzmetin atqardy.
- Atap aıtqanda, biz kelissózder júrgizdik, zańnama normalaryn túsindirdik, teńgerimdi quqyqtyq sheshimge qol jetkizdik. Metamen birneshe onlaın kezdesý ótkizdik. Osy kezdesýler barysynda Meta dıalogqa ashyqtyq tanytyp, bizdiń usynystarymyzǵa jedel den qoıdy. Búgin biz kelisimge qol qoıylǵanyn habarlaýǵa qýanyshtymyz. Kelisimniń qoldanylý merzimi 2 jyldy quraıdy. Instagram jáne Facebook-te qazaqstandyq mýzykany paıdalanýdy retteıtin Meta jáne «Qazaqstannyń avtorlyq qoǵamy» RQB ýaǵdalastyqqa qol jetkizdi. Ótken aptadan bastap kontent qaıta orala bastady. Meta kásibılik jáne syndarly kózqaras tanytty. Kompanııa avtorlyq quqyqty saqtaýǵa jáne qazaqstandyq quqyq ıelenýshilerdiń múddelerin qurmetteýge daıyn ekendigin rastady. Sonymen qatar, ol memlekettik jáne kásibı ınstıtýttarmen seriktestik ornatýǵa degen umtylysyn kórsetti, - dedi Sholpan Ábdireeva.
Osyǵan deıin Facebook jelisiniń aqparat ındýstrııasyn qoldaýǵa 1 mlrd dollar ınvestıtsııalaıtynyn jazdyq.