«Meta» kompanııasynyń basshysy: Qazaq tiliniń mańyzdylyǵyn sezemin

ASTANA. QazAqparat - QR Aqparat jáne qoǵamdyq damý mınıstri Darhan Qydyráli «Meta» kompanııasynyń memlekettik organdarmen baılanys jónindegi basqarýshy dırektory Djordj Chen kezdesti, dep habarlaıdy QazAqparat mınıstrlikke silteme jasap.

Kezdesýde Djordj Chen «Qazaq tiliniń mańyzdylyǵyn sezemin. Bolashaqta kóp dostar tabý úshin qazaq tilin úırenemin dep úmittenemin», - dedi.

Al Aqparat mınıstri qazaq tili Qazaqstanda ǵana emes, álemniń birneshe elinde keń qoldanysqa ıe ekenin eskerip, Instagram jelisiniń qazaq tilindegi ınterfeısin jasaý máselesin kóterdi.

«Bul bizdiń azamattar ǵana emes, basqa da eldegi qazaqtildi qaýymnyń da Facebook pen Instagram qosymshalaryn qazaq tilinde qoldanýyna múmkindik beredi», - dedi mınıstr.

Soǵan baılanysty Meta family qosymshalarynyń qazaq tilindegi ınterfeısin jasaý jáne ony jetildirý qajettigin atap ótti.

Óz kezeginde Djordj Chen, ásirese, balalarǵa arnalǵan onlaın qaýipsizdik salasynda yntymaqtasa jumys isteýge daıyn ekenin atap ótti.

Sondaı-aq Meta men Qazaqstan Úkimeti túrli salalardaǵy ózara is-áreket pen áriptestikti nyǵaıta alady dep senim bildirdi. Meta kompanııasy Qazaqstandaǵy ókilin taǵaıyndaǵaly jatqanyn málimdedi.

Darhan Qydyráli Djordj Chendi jýyrda ótetin Astana Media Week jáne Central Asian Media Forumǵa shaqyrdy.

Sondaı-aq mınıstrdiń Meta tarapyna jergilikti baspasóz hatshylary úshin áleýmettik medıa boıynsha arnaıy trenıngter ótkizý usynysy qoldaý tapty. Meta kompanııasynan Facebook pen Instagram boıynsha kásibı jattyqtyrýshylar keledi.

Sonymen birge taraptar balalar kontenti máseleleri boıynsha ózara jumys isteýge jáne tsıfrlyq medıasaýattylyq týraly arnaıy baǵdarlama jasaýǵa kelisti.

Foto : gov.kz