Meta Instagram qoldanýshylarynyń naqty jasyn anyqtaý úshin JI qoldanady
ASTANA. KAZINFORM – Meta kompanııasy Instagram qoldanýshylarynyń jasyn jasandy ıntellekt kómegimen anyqtaý tehnologııasyn búkil álemde keńeıtetinin jarııalady. Jańa júıe mıllıondaǵan jasóspirimdi qosymsha qorǵaý sharalarymen qamtýǵa múmkindik beredi, dep habarlaıdy Anadolu agenttigine.
Kompanııanyń málimetinshe, tehnologııa tirkelý kezinde kámeletke tolǵanyn kórsetetin týǵan kúnin jazǵanyna qaramastan, jasóspirim qoldanýshylardy anyqtaı alady.
Júıe jasóspirim dep tanyǵan akkaýnttar avtomatty túrde qosymsha shekteýleri bar Teen Accounts arnaıy rejımine aýystyrylady.
Atap aıtqanda, mundaı akkaýnttarda beıtanys adamdarmen baılanysýǵa, belgili bir kontentti kórýge jáne áleýmettik jelide ótkizetin ýaqytqa shekteýler qoıylady.
Meta Facebook áleýmettik jelisinde de jasty anyqtaý tehnologııasyn engizýdi jalǵastyryp jatyr. Kompanııa jyl sońyna deıin Threads platformasynda da osyndaı júıeni búkil álem boıynsha iske qosýdy josparlap otyr.
Qaýipsizdik sharalaryn keńeıtý Meta kompanııasynyń AQSh-tyń 52 shtaty, aýmaǵy men Kolýmbııa okrýginiń bas prokýrorlarymen jasasqan kelisimine baılanysty. Qujat kámeletke tolmaǵan qoldanýshylardy, sonyń ishinde 13 jasqa tolmaǵan balalardy anyqtaý tetikterin jetildirýge baǵyttalǵan.
Qarasha aıynda AQSh-taǵy jasóspirimderdiń ata-analary Instagram-nan qoldanystaǵy qorǵanys sharalary jáne tirkelý kezinde shynaıy jasty kórsetý qajettigi týraly habarlama ala bastaıdy.
Sonymen qatar Aýstralııada Meta Apple usynatyn qoldanýshylardyń jas sanattary týraly aqparatty qosymsha tekserý quraly retinde paıdalana bastady.
Kompanııa TikTok pen YouTube platformalaryn da kámeletke tolmaǵandardy qorǵaýdyń osyndaı tetikterin engizýge shaqyrdy.
Habarlamada aıtylǵandaı, tamyzda jarııalanǵan kelisim aıasynda Meta jas qoldanýshylarǵa arnalǵan qosymsha shekteýler engizýge mindetteme alǵan. Olardyń qatarynda áleýmettik jelini kúndelikti paıdalaný ýaqytyna lımıt qoıý, túngi ýaqytta qoldanýdy shekteý, mektep sabaqtary kezinde habarlamalardy óshirý jáne ata-analyq baqylaý múmkindikterin keńeıtý bar.
Aıta keteıik, buǵan deıin AQSh-tyń Nıý-Meksıko shtatynyń soty Meta Platforms kompanııasyn Facebook qoldanýshylaryna jeke derekterdi qorǵaý máselesinde jańylystyrǵany úshin 25 mlrd dollar tóleýge mindettegen edi.