Meta Facebook-tiń densaýlyqqa tıgizetin teris áseri jónindegi tól zertteýin jasyrǵan

ASTANA. KAZINFORM — Meta óz platformalarynyń psıhologııalyq zııany týraly derekterdi jarııaǵa jar salmaı, kerisinshe qupııada ustap, jasyryp kelgen. Bul týraly 24 kg Reuters agenttigine silteme jasap, jazdy.

Agenttiktiń málimetinshe, Facebook pen Instagram-nyń ıesi sanalatyn kompanııa osy platformalardyń paıdalanýshylarǵa psıhologııalyq zııan keltiretinin dáleldeıtin zertteýdi toqtatyp tastaǵan.

Reuters AQSh-taǵy mektep okrýgteri men Meta arasyndaǵy áleýmettik jelilerdiń jasóspirimderge zııany týraly sot isinde usynylǵan qujattarǵa silteme jasaıdy.

Qujattarǵa sáıkes, Meta 2020 jyly Project Mercury dep atalatyn zertteý jobasyn uıymdastyrǵan. Joba aıasynda Facebook qoldanýshylaryna biraz ýaqyt áleýmettik jelini paıdalanbaý usynylǵan. Bar bolǵany bir aptadan keıin áleý jeliden bas tartqan qatysýshylar depressııa, alańdaýshylyq, jalǵyzdyq sezimderiniń azaıǵanyn jáne áleýmettik qysymnyń tómendegenin habarlaǵany aıtylady. Bul nátıjeden keıin zertteý toqtatylyp, onyń qorytyndylary eshqashan jarııalanbaǵan.

Meta ókili bul zertteýdi jasyrý týraly aıyptaýlardy joqqa shyǵaryp, onyń «ádistemelik kemshilikterge baılanysty» toqtatylǵanyn málimdegenin Reuters jazady.

Aıta keteıik, buǵan deıin Meta JI zertteýshileriniń sanyn qysqartatynyn jazǵan edik.