Meta Donald Tramptyń ınaýgýratsııa qoryna 1 mln dollar jiberdi
ASTANA. KAZINFORM — Facebook jáne Instagram áleýmettik jelilerine ıelik etetin Meta Corporation AQSh-tyń jańadan saılanǵan prezıdenti Donald Tramptyń ınaýgýratsııa qoryna 1 mıllıon dollar jiberdi. Bul týraly Anadoly jazdy.
Wall Street Journal (WSJ) Mark Tsýkerberg qorǵa 1 mıllıon dollar aýdarǵanyn habarlaǵan. Bul qarajat AQSh-tyń 47-shi prezıdentin ulyqtaý rásimine jumsalatyn shyǵyndardy óteýge baǵyttalady. Kompanııa bundaı qaıyrymdylyqtyń sebepteri týraly esh málimet bermegen.
Tsýkerberg osy qadamy arqyly Tramppen qarym-qatynasty jaqsartýǵa tyrysýda.
Tramp óziniń «Amerıkany qutqarý» kitabynda Tsýkerbergti 2020 jylǵy saılaýda ózine «qarsy is-áreketterge bardy» dep aıyptap, eger 2024 jylǵy saılaýǵa da aralassa, ómir boıyna túrmege qamalady dep eskertken.
Kompanııa buǵan deıin 2017 jyly Trampty da, 2021 jyly Djo Baıdendi de ulyqtaý qoryna eshqandaı úles qospaǵan. Basylym Tsýkerberg bul joly erekshe qadamǵa bardy dep topshylady.
Sonymen qatar, osy jyldyń qarasha aıynda Tsýkerberg Florıdadaǵy Mar-a-Lago rezıdentsııasynda Tramppen kezdesip, Ray-Ban smart kózildirikterin tanystyrǵan jáne bireýin syıǵa tartqan.
Aıta keteıik, osyǵan deıin Mark Tsýkerberg áleýmettik jelilerdiń qurbany bolǵan jasóspirimderdiń ata-analarynan keshirim suraǵany habarlandy.