Meta balalardyń qaýipsizdigine qatysty talaptardy retteý úshin $17 mlrd tóleýge kelisti
ASTANA. KAZINFORM — Meta kompanııasy Facebook jáne Instagram platformalaryndaǵy balalardyń qaýipsizdigin kúsheıtý jáne jasóspirimderdiń áleýmettik jelilerge táýeldiligine qatysty sot daýyn retteý úshin 17 mlrd dollar tóleýge kelisti. Bul týraly AQSh-tyń 47 shtatynyń bas prokýrorlary málimdedi, dep habarlaıdy Euronews.
Kalıfornııa, Kolorado, Kentýkkı jáne Nıý-Djersı sııaqty 29 shtat 2023 jyly tehnologııalyq kompanııaǵa qarsy sotqa talap aryz bergen. Qazirgi kelisimder istiń josparlanǵan merziminen buryn aıaqtalýyna múmkindik berdi.
Balalar qaýipsizdigin qorǵaýshylar federaldy sotta Meta bas dırektory Mark Tsýkerbergtiń kýáger retinde jaýap bergenin kútti.
Vırdjınııa shtaty boıynsha kelisim somasy 353 mln dollar. Shtattyń bas prokýrory Djeı Djons bul AQSh shtattary deńgeıindegi tutynýshylardyń quqyqtaryn qorǵaý salasyndaǵy eń iri kelisimderdiń biri ekenin atap ótti.
Onyń aıtýynsha, kelisim «qaýipti tájirıbelerge núkte qoıyp, balalardy ınternettegi qaýipten naqty qorǵaýdy qamtamasyz etedi».
Talap aryzda Meta kompanııasy balalardyń platformalaryna táýeldiligin kúsheıtetin fýnktsııalardy ádeıi engizý jáne olardyń yqtımal zııany týraly qoǵamǵa aqparatty jasyrdy dep aıyptalǵan. Sondaı-aq kompanııa 13 jasqa tolmaǵan balalardyń ata-analarynyń kelisiminsiz olardyń derekterin júıeli túrde jınaý arqyly federaldyq zańdy buzdy degen aıyp taǵylǵan.
Sot protsesi ótken aptada Kalıfornııa shtatynyń Oklend qalasynda AQSh aýdandyq sotynyń sýdıasy Ivonna Gonsales Rodjerstiń tóraǵalyǵymen bastalǵan.
Usynylǵan kelisim aıasynda Meta balalardyń qaýipsizdigin arttyrýǵa baǵyttalǵan birqatar sharany engizýge kelisti. Olardyń qatarynda Instagram men Facebook qoldanatyn balalar úshin kúndelikti ekran ýaqytyn qatań shekteý jáne mindetti úzilister engizý bar.
Kompanııa jumys kúnderi sabaq ýaqytynda push-habarlamalardy óshiredi. Sonymen qatar jasty tekserýdiń senimdi tetikteri engizilip, jas ereksheligine saı kontent baptaýlary kúsheıtiledi. Bul balalardy kıberbýllıngten qorǵaýǵa jáne tamaqtaný tártibiniń buzylýy men ózine zııan keltirýge baılanysty qaýipti materıaldarǵa qoljetimdilikti shekteýge baǵyttalǵan.
Budan bólek, ata-analarǵa arnalǵan baqylaý quraldary jetildirilip, áleýmettik salystyrýdy kúsheıtetin fýnktsııalarǵa, sonyń ishinde jarııalanymdardaǵy laık sanyn kórsetýge qatysty shekteýler engiziledi.
Buǵan deıin Meta-ǵa 1,4 trıllıon dollar aıyppul salynýy múmkindigi týraly jazǵan edik.
