Messıdiń «Inter Maıamıdegi» jalaqysy belgili boldy

Soltústikamerıkalyq bas fýtbol lıgasy (MLS) – «Inter Maıamı» klýbynyń argentınalyq shabýylshysy Lıonel Messıdiń bazalyq aılyǵy – 12 mln dollar. Sondaı-aq ol kepil ótemaqysy retinde taǵy 20,45 mln dollar alady. Bul týraly MLS oıynshylarynyń kásipodaq saıtynda málim etilgen. Kazinform bul týraly TASS agenttigine silteme jasap habarlaıdy. 

«Inter Maıamıde» Messımen birge onyń ıspanııalyq «Barselonadaǵy» áriptesteri qorǵaýshy Jordı Alba men jartylaı qorǵaýshy Serhıo Býskets oınaıdy.

Albanyń bazalyq jalaqysy – 1 mln dollar, kepil ótemaqysy – 1,25 mln dollar. Al Býskets bazalyq aılyq retinde 1,5 mln dollar, ótemaqy retinde 1,775 mln dollar alady.

Messı frantsııalyq PSJ klýbynda eki maýsym oınap, maýsym aıynda «Inter Maıamıge» aýysty. Jańa klýb quramynda ol 13 match ótkizip, 11 gol soqty, 5 ret nátıjeli pas berdi.

Onymen birge 2018 jyly negizi qalanǵan «Inter Maıamı» tarıhtaǵy alǵashqy jetistigi – Lıga kýbogine qol jetkizdi.

Messı 36 jasta. Ol – marapat sany boıynsha rekord ıesi, enshisinde 44 tıtýl bar. 2003 jyldan 2021 jylǵa deıin Messı «Barselona» quramynda bolyp, 10 ret Ispanııa chempıony atandy. 8 ret Ispanııa Sýperkýbogin, 7 ret Ispanııa Kýbogin jeńip alǵan, 4 ret Chempıondar lıgasynda, 3 retten ÝEFA sýperkýbogi men klýbtyq álem chempıonatynda jeńimpaz atanǵan.

2021 jyly ol jyldyń úzdik fýtbolshysyna beriletin «Altyn dopqa» 7-shi ret ıe bolyp, rekord jasady.