Messıdiń advokattary salyqtan jaltardy dep shyǵarylǵan úkimge shaǵym túsiretinderin málimdedi
ASTANA. QazAqparat - Lıonel Messı advokattary «Barselona» shabýylshysyn salyqtan jaltardy dep aıyptap, 21 aı túrmege jabý týraly ıspanııalyq sot úkimine shaǵym túsiretinderin málimdedi, dep habarlaıdy Bı-bı-sı.
Sársenbi kúni sot fýtbolshyny 21 aıǵa bas bostandyǵynan aıyrý týraly úkim shyǵardy. Messıdiń ákesine de osyndaı úkim kesilgen. Odan bólek, fýtbolshy 2 mıllıon eýro (2,2 mıllıon dollar), al onyń ákesi 1,5 mıllıon eýro kóleminde aıyppul tóleýi tıis.
Otyrys barysynda sot fýtbolshynyń Danone, Adidas, Pepsi-Cola jáne basqa da kompanııalarmen jasasqan jarnamalyq kelisimsharttaryn qarap shyqty.
Prokýratýranyń aıtýynsha, fýtbolshy men onyń ákesi 4,1 mln. eýro kólemindegi qarajatqa salyq tólemegen. Salyq tólemeý úshin olar ofshor shemasyn paıdalanǵan.
