Messıdi alty aıǵa ulttyq quramadan shettetýi múmkin
NUR-SULTAN. QazAqparat – Ońtústikamerıkalyq fýtbol konfederatsııasy Argentına quramasynyń shabýylshysy Lıonel Messıge 2019 jylǵy Amerıka Kýbogynda kórsetken oǵash qylyǵy úshin oıyndardan shettetý merzimin qaıta qarap, alty aıǵa deıin uzartýy múmkin, dep habarlaıdy QazAqparat argentınalyq TyC Sports telearnasyna silteme jasap.
Sársenbi kúni Messı bir matchqa shettetilip, oǵan $1,5 myń kóleminde aıyppul salyndy. Sondaı-aq, 32 jastaǵy shabýylshynyń 2022 jyly Katarda ótetin álem chempıonatynyń irikteý kezeńindegi alǵashqy kezdesýge qatyspaıtyny aıtylǵan edi.
Amerıka Kýbogy barysynda Messı birneshe shýly oqıǵanyń qatysýshysy boldy. Olardyń mán-jaıy anyqtalǵan jaǵdaıda oıyndardan shettetilý merzimi uzartylýy múmkin. Atalmysh máseleniń sheshimi kelesi aptada belgili bolady.
Messı Amerıka Kýbogynyń jartylaı fınalynda Brazılııa komandasymen ótken matchtyń nátıjesine qatysty tóreshiler tarapyna syn aıtqan. Oıynda argentınalyqtar alań ıelerinen 0:2 esebimen jeńilgen edi. Sondaı-aq, fýtbolshy týrnırdegi tóreshiler quramyna narazylyq retinde marapattaý rásimine qatysýdan bas tartyp, Chılı komandasymen úshinshi oryn úshin ótken kezdesýden (2:1) keıin Ońtústikamerıkalyq fýtbol konfederatsııasyn jemqorlyqqa batty dep kiná taqty. Match barysynda Messı teris qylyǵy úshin alańnan qýyldy.
Argentına quramasynyń quramynda Messı 2008 jylǵy Beıjiń olımpıadasynda altyn medal, 2014 jyly Brazılııada ótken álem chempıonatynda kúmis júlde jeńip alǵan edi. Fýtbolshy bes márte álemniń úzdik oıynshysy dep tanylǵan.
