Messı jaraqattanyp qaldy
NUR-SULTAN. QazAqparat - «Barselona» fýtbol klýbynyń oıynshysy Lıonel Messı oń jaq aıaǵyn jaraqattap aldy. Saldarynan fýtbolshy komandanyń AQSh boıynsha maýsymaldy týryna qatysa almaıtyn boldy, dep habarlaıdy QazAqparat klýbtyń baspasóz qyzmetine silteme jasap.
32 jastaǵy Messı dúısenbi kúngi jattyǵý kezinde aıaǵynyń aýyrǵanyn sezgen. Tekseristen ótkennen keıin ony AQSh-ta ótetin týrdyń quramyna qospaý týraly sheshim qabyldandy. Týr barysynda «Barselona» ıtalııalyq «Napolı» komandasyna qarsy eki match ótkizedi dep josparlanǵan.
Messı «Barselona» quramynda júrip, Ispanııanyń on márte chempıony, Ispanııa Sýperkýbogynyń segiz márte ıegeri, Ispanııa Kýbogynyń alty márte ıegeri, Chempıondar lıgasynyń tórt márte jeńimpazy, ÝEFA Sýperkýbogynyń úsh márte ıegeri jáne klýbtyq álem chempıonatynyń úsh márte jeńimpazy atanǵan edi. Argentınalyq fýtbolshy bes ret álemniń úzdik oıynshysy ataǵyna ıe bolǵan.
