Messı PSJ sapyndaǵy sońǵy oıynyn ótkizedi
Argentınalyq shabýylshy Lıonel Messı frantsııalyq «Parı Sen-Jermen» fýtbol klýbynan bıylǵy maýsym aıaqtalǵannan keıin ketedi.
«Men úshin fýtbol tarıhyndaǵy álemniń úzdik oıynshysyna bapkerlik jasaý - úlken mártebe», - dedi parıjdik klýbtyń bas bapkeri baspasóz máslıhatynda.
«Ol árqashan komanda úshin jumys istedi. Árdaıym oıynda boldy. Áriptesine pas berdi nemese gol soqty. Qaıtalap aıta keteıin, bul men úshin tek bapkerlik jasaý ǵana emes maýsymnyń barlyq kezeńinde qasynda júrgenimdi úlken mártebe dep baǵalaımyn», - dedi Galte.
«Parı Sen-Jermen» 3 maýsymda Parıjde Frantsııa chempıonatynyń qorytyndy týrynda «Klermonǵa» qarsy oınaıdy. Parıjdik klýb aldyn ala el chempıony atanyp úlgerdi.
Messı komanda sapyna 2021 jyly erkin agent quqyǵy boıynsha qosylǵan edi. «Klermonǵa» qarsy oıyn ol úshin PSJ sapyndaǵy sońǵy kezdesý bolady.
Messı qaıda barady
Sport taqyrybynda jazatyn basylymdar Messı áıgili fýtbolshy Krıshtıaný Ronaldýdyń sońynan Saýd Arabııasyna barýy múmkin ekenin aıtady. Sondaı-aq, AQSh-ta oıyn kórsetýi nemese Ispanııaǵa oralýy múmkin ekenin joqqa shyǵarmaıdy.
Saýd Arabııasynyń «Al-Hılıal» klýby Messıge eki jylǵa 1,2 mlrd evro turatyn kelisim-shartty usyndy. Odan buryn «Frans Press» agenttigi senimdi derek kózderine súıenip, Saýd Arabııasyndaǵy bir klýbqa aýysýy sheshilip qoıǵan másele ekenin atap ótken.
Sondaı-aq, Messıdiń AQSh-ta mansabyn jalǵastyrýǵa múmkindigi bar ekeni aıtylyp keledi. Onda «Inter Maıamı» klýby jylyna 50 mln dollar kóleminde tórtjyldyq kelisim-shart usynǵan.
Taǵy bir derek boıynsha «Barselona» Messıge qyzyǵýshylyq tanytýy múmkin. Atalǵan klýbta argentınalyq fýtbolshy on márte Ispanııa chempıony atandy. Tórt márte Chempıondar lıgasynda jeńimpaz boldy. Úsh márte ÝEFA sýperkýbogy men klýbtar arasyndaǵy álem chempıonatynda jeńis tuǵyryna kóterildi.
Eske salsaq, budan buryn Maýrısıo Pochettıno «Chelsı» fýtbol klýbynyń bas bapkeri boldy.
