Messı men Ronaldý Ispanııa chempıonatynan ketpeıdi
ASTANA. QazAqparat - Batystyq basylymdar Messı men Ronaldýdyń óz komandalarynan ketpeıtinin jarysa jaza bastady. Osyǵan deıin qos fýtbolshy da ózge klýbtarǵa aýysýy múmkin ekendigi jaıly aqparattar jarııalanǵan edi, dep jazady Massaget.kz.
Álemdegi úzdik sanalatyn eki fýtbolshy da Ispanııadaǵy salyq mólsherinen japa shegip keledi. Tipti argentınalyq fýtbolshy salyq máselesine baılanysty sotty da boldy. Osy bir keleńsiz oqıǵadan keıin sarapshylar Messıdi ózge komandaǵa aýysýy múmkin ekenin aıta bastady. Fýtbolshy bul iske qatysty tolyq tis jaryp aıtpasa da, sporttyq mansabyn "Barselonada" aıaqtaǵysy keletinin o bastan aıtyp-aq keledi.
Degenmen jankúıerler oıynshynyń komandamen kelisimshartyn uzartpaǵanyna kúmándanyp-aq júrdi. Sol kúmándary seıiletin kez kelgen sekildi. Lıonel Messı 15 shilde kúni komandamen kelisimshartyn 2022 jylǵa deıin uzartpaq eken.
Sport.es basylymynyń habary boıynsha, shabýylshy "blaýgrana" sapynda 35 jasqa deıin oınaıtyn bolady. Al qazirgi kelisimsharty 2018 jyldyń jazynda aıaqtalatyn edi.
Krıshtıaný Ronaldý da ózge komandaǵa aýysýy múmkin ekeni aıtyla bastaǵan. El Confidencial basylymynyń málimetterine súıensek, álemniń úzdik fýtbolshysy "koroldik klýbtyń" prezıdenti Florentıno Pereske eshqaıda ketpeıtinin aıtqan.
- Ronaldý "salyq tólemedi" degen aıyptardan sharshady. Ol maǵan eshqashan zań buzbaǵanyn aıtty. Biraq tilshiler ony qylmysker qylýda. Ne bolsa da, Krıshtıaný "Realdan" ketpeıtinin málim etti, - dedi madrıdtik klýbtyń basshysy.
Aıta keteıik, Lıonel Messı Ispanııa La lıgasynda 2003 jyldan, Krıshtıaný Ronaldý 2009 jyldan beri oınap keledi.
