Messı izdegen búldirshin Aýǵanstannan tabyldy (FOTO)
ASTANA. QazAqparat - Etılen paketten «tigilgen» fýtbolkanyń artyna óziniń súıikti fýtbolshysy - Lıonel Messıdiń atyn jazyp alǵan bala Aýǵanstannan tabyldy. Onyń aty - Murtaza Ahmadı.
Esterińizde bolsa, birneshe kún buryn kók paketten fýtbolka jasap, artyna «MESSI 10» degen jazý jazyp alǵan balanyń sýreti búkil álemge tarap ketken bolatyn. Tipti, ataqty fýtbolshy, «Barselonanyń» shabýylshysy, Argentına quramasynyń kapıtany, «Altyn dop» ıegeri Messıdiń ózi bul balaǵa izdeý salǵan. Sondyqtan, álemdik buqaralyq aqparat quraldarynyń ókilderi bul balany izdeýge kúsh saldy.
VVS agenttiginiń habarlaýynsha, Murtazanyń jıen aǵasy, Avstralııada turatyn aýǵandyq Azım Ahmadı ınternetke Murtazanyń sýretin salǵan soń, balany tabý múmkin bolǵan.
Jýrnalıster Azım Ahmadı arqyly Murtazanyń ákesi Arıf Ahmadımen baılanys ornatýǵa múmkindik alady. Arıf Ahmadı búkil álem «Messıdiń naǵyz jankúıeri» dep ataǵan sýrettegi bala onyń uly ekenin rastady. Arıf Ahmadıdiń aıtýynsha, Murtazaǵa paketten fýtbolka jasap bergen Murtazanyń aǵasy eken. Sol aǵasy Murtazanyń sýretin qyzyq kórip, Feısbýk áleýmettik jelisine salǵan. Sýret osydan eki jyl buryn túsirilgen eken, qazir Murtaza bes jasta. Ákesiniń aıtýynsha, Murtaza óziniń úsh jastaǵy sýreti álemdi sharlap ketkenin, onyń fýtbol men Messıge degen qurmeti úshin qanshama adam alǵys aıtyp jatqanyn biledi jáne qazir Murtaza ózin eń baqytty bala dep ataıdy eken.
Murtaza men onyń otbasy Aýǵanstannyń Gaznı provıntsııasynda turady. Áleýmettik jelide Messı izdegen balanyń tabylǵany tolassyz aıtylyp jatyr, sondyqtan, bul súıinshi habar ataqty fýtbolshynyń qulaǵyna da jetip, ýáde bergendeı - kishkentaı Murtazaǵa óziniń fýtbolkasyn syılaıtynyna senimdimiz.
