Messı Ispanııa tarıhyndaǵy rekordtyq salyq tóleıdi
ASTANA. QazAqparat - Katalondyq «Barselona» klýbynyń shabýylshysy Lıonel Messı Ispanııa qazynasyna 53 mln. eýro somasynda salyq tóleıtin boldy, dep habarlady sheteldik BAQ.
Ol kúntizbelik jyl ishinde eldiń qazynasyna osynshama kólemde qarjy quıatyn Ispanııadaǵy alǵashqy salyq tóleýshi bolmaq. Atalǵan somaǵa oıynshynyń jalaqysynan, múlki men jarnamalyq kelisimsharttarynan alynatyn salyqtar kiredi. Buǵan qosa, 2010-2012 jyldary aralyǵynda 22,4 mln. eýro kólemindegi salyqty tólemegen Messı osy jyly bul qarjyny da qaltasynan shyǵarýǵa májbúr. Aıta keterligi bul qarjy, ilgeride atalǵan 53 mln. eýronyń ishine kiredi. Al bul somanyń ózi taǵy da 3 mln. eýroǵa artýy múmkin. Óıtkeni 2007-2009 jyldary aralyǵynda Messı jarnama jáne demeýshilik kelisimsharttardan tapqan tabysyn deklaratsııalamaǵan kórinedi.
