Messı Ispan qazynasyna 33 mln. eýro tóleıtin boldy
ASTANA. QazAqparat - Messı Ispan qazynasyna 33 mln. eýro tóleıtin boldy, dep jazady sheteldik BAQ.
Osylaısha ataqty fýtbolshy qylmystyq qýdalaýdan aman qalyp otyr. Al polıtseıler bolsa, Messı ákesiniń aılakerlikpen aınalysyp júrgeninen habarsyz bolǵan dep sanaýda.
Katalonııalyq «Barselona» jáne Argentına quramasynyń shabýylshysy Lıonel Messı ákesiniń aılakerligi úshin Ispanııanyń memlekettik qazynasyna 32,9 mln. eýro tólemek, - dep habarlaıdy Marca.
Tergeýshiler Úlken-Messıdiń 2007-2009 jyldar aralyǵyndaǵy kezeńde salyq organdarynan 4,1 mln. eýro kóleminde qarjyny jasyrǵandyǵyn dáleldep shyqqan. Sóıtip, sot juldyzdy fýtbolshyǵa bes mıllıon eýro jáne osy somanyń aıyppuly retinde 2,7 mln. eýro tóleýge mindettep, sheshim shyǵarǵan.
Sonymen qatar, Horhe Messıdiń 2010-2012 jyldar aralyǵyndaǵy salyqtyq kezeńde 25 mln. eýro tólemegendigi taǵy anyqtalǵan. Mine, osyndaı somalardy jınaqtaı kelgende fýtbolshy Ispan qazynasyna 32,9 mln. eýro tóleýge boryshty bolyp otyr.
Al polıtseılerdiń túsindirýinshe, Lıonel Messı ákesiniń nemen aınalysyp júrgendiginen habarsyz bolǵandyqtan, onyń aılakerlikke esh qatysy joq dep tanylǵan. Sondyqtan da ol qylmystyq qýdalaýǵa ushyramaǵan.
Esterińizge sala keteıik, osy kúnderi fýtbolshy Brazılııada ótip jatqan álem chempıonatynda óz eliniń ulttyq quramasynyń qatarynda óner kórsetýde.
