Messı Aýǵanstandaǵy bes jasar jankúıerimen kezdespek
ASTANA. QazAqparat - Aýǵanstannyń ońtústik-batysyndaǵy Gaznı qalasynan - «Barselona» men Argentına quramasynyń oıynshysy Lıonel Messıdiń jankúıeri bes jasar Mortaza Ahmadı taıaýda kýmırimen kezdesetinine úmitti.
Budan buryn ınternette Mortazanyń plastıkalyq paketten jasalǵan fýtbolkasyna Messı dep jazyp alǵan sýreti paıda bolyp, búkil álemge tarap ketken bolatyn. Argentına quramasynyń oıynshysy balamen kezdesýge kelisti. Balanyń ákesi Mýhammad Arıf (Mohammad Aref) Sputnik Dari tilshisi Zýhal Sarhadpen áńgimelesý barysynda balasy fýtboldy qalaı jaqsy kóretini jaıly aıtyp berdi, dep jazady sheteldik BAQ.
«Barlyǵy bir jyl buryn Mortazanyń aýlada balalarmen fýtbol oınaǵanynan keıin bastaldy. Sodan keıin ol fýtboldy teledıdardan kóre bastady. Ol Messıge bolyssa, aǵasy basqa fýtbolshyǵa jankúıer. Jaryq joq, 14-dıýımdy teledıdardy qosý úshin kún energııasyn paıdalanamyz. Mortaza Messı fýtbolkasyn kópten beri armandap júr. Sondyqtan da ol Argentına quramasynyń formasyna uqsaıtyn aq-kókshil plastıkalyq paketti satyp alǵan. Onyń aǵasy paketke flamastermen «10» sany men «Messı» dep jazǵan. Mortazada fýtbol oınaý úshin dop ta joq, ol aǵasynan surap alyp, dostarymen aýlada oınaıdy. Ulym Messımen kezdeskisi keledi. Biz de kúnderdiń kúni ol armanyna jeter degen úmittemiz».
Aýǵanstan fýtbol federatsııasynda Lıonel Messıdiń ókilderi olarmen baılanysqa shyqqanyn habarlaǵan. Qazir uıym Mortazamen kezdesýdi uıymdastyrý jumystaryn júrgizýde.
«Aýǵanstan fýtbol federatsııasy basshylyǵy Messı men «Barselonadan» kezdesýge qatysty habarlama aldy», - dedi federatsııanyń baspasóz hatshysy Saıed Alı Kazemı EFE-ge bergen suhbatynda.
