Messı áseri: Álemdik fýtboldyń ańyz adamy «PSJ-ny» baıytady
PARIJ. QazAqparat – Lıonel Messıdiń «Parı Sen-Jermen» (PSJ) frantsýz fýtbol klýbyna ótýi jurtty shýlatty. Jankúıerler Messı beınelengen klýbtyń atrıbýtıkasyn satyp alý úshin kezekke turyp jatyr, dep habarlaıdy QazAqparat Reuters-ke silteme jasap.
Argentınalyq fýtbolshynyń sýreti beınelengen klýb fýtbolkalary Parıjdegi «PSJ-nyń» dúkeninde satylyp jatyr. Áleýmettik jeli qoldanýshylary jańa klýbtyń akkaýntyna mıllıondap jazylýda. Al, «PSJ-nyń» Messı qatysatyn matchtaryn kórsetý quqyǵyn satyp alý úlken tabys ákeledi. Lıonel Messıdiń Parıjge kelýi aqsha aǵymyna yqpal etýde.
«PSJ» tóraǵasy Nasser al-Helaıfı sársenbi kúni jýrnalısterge 34 jastaǵy alty dúrkin «Altyn dop» ıesiniń klýbqa ákeletin tabysyna adamdardyń tańǵalatynyn málim etti.
Parıjdiń ortalyǵyndaǵy «PSJ» dúkeninde bir jankúıerdiń Messıdiń sýreti bar 165 eýro (194 dollar) turatyn fýtbolkany satyp alý úshin eki saǵat kezekte turǵan.
Men ony satyp alǵym keldi. Bul PSJ-ǵa kóp aqsha ákelse, jankúıerlerge – qýanysh syılaıdy. Bári de baqytty bolady», - dedi 18 jastaǵy Djonatan Msıed Reuters-ke.
Sport marketıngi jónindegi sarapshy Vensan Shodeldiń aıtýynsha, Amazon (AMZN.O) kompanııasy da tabysqa kenelmek. Bul kompanııa osy jyldyń maýsym aıynda joǵary frantsýz fýtbol dıvızıonynyń 80% matchyn translıatsııalaý quqyǵyn jeńip alǵan.
«Amazon kompanııasyn lotereıa utyp aldy desek bolady. Messıdiń qatysýymen ótetin osynsha matchty az aqshaǵa kórsetý – úlken jeńis. Ekinshi jeńimpaz - «PSJ». Ol álemniń iri klýbtary arasynda óz ornyn nyǵaıtpaqshy», - dep atap ótti Shodel.
Aıta keteıik, óz mansabynda tek «Barselonada» oınaǵan Messı kelisimshartty uzartý týraly kelisimge kele almaǵandyqtan katalondyq klýbtan ketýge májbúr bolǵan edi. Kóp uzamaı onyń jańa klýbqa qatysty óz tańdaýyn jasaǵany týraly aqparat taratyldy. 34 jastaǵy fýtbolshy «Barsamen» 36 týrnırde jeńiske jetip, 672 gol soqty. Messı ótken jyly jazda «Barselonadan» ketpekshi boldy, biraq klýb ony jibergen joq. Osy jyldyń 1 shildesinde ol bos agent atandy. Senbi kúni Messı klýbpen kózine jas alyp qoshtasyp, jankúıerleri men klýbtaǵy áriptesterine alǵys aıtty.
