Meshittiń janyndaǵy qosalqy ǵımarat tarıhı-mádenı muraǵa jatpaıdy – ákimdik
ShYMKENT. KAZINFORM – Shymkent qalasynyń ákimi Ǵabıt Syzdyqbekov «Shyńǵysbaı qajy» meshitine arnaıy baryp, keshenniń qazirgi jaǵdaıymen tanysty.
Qala ákimi Ǵabıt Syzdyqbekov qurylys jumystaryn tezdetip, ári sapaly etip eki aıdyń ishinde aıaqtaýdy tapsyrdy. Qazir meshit ǵımaraty zaqymdalmaǵan, jamaǵatqa táýlik boıy qyzmet kórsetýde. ıAǵnı, árbir adamnyń bes ýaqyt namaz oqyp, qulshylyq jasaýyna tolyq múmkindik bar.
«Meshittiń janyndaǵy qosalqy salynǵan ǵımarat tarıhı-mádenı muraǵa jatpaıdy. Medrese 1998 jylǵa deıin shákirt oqytty. Apattyq jaǵjaıda bolǵanyna baılanysty qazirgi ýaqytqa deıin bos turdy. Tıisti zerdeleý jumystaryn júrgizgen «Tech-Inspection» JShS-niń saraptamalyq qorytyndysyna sáıkes, atalǵan qosalqy ǵımarat apatty jaǵdaıda dep tanyldy. Sondyqtan qosymsha nysan buzylyp, josparǵa saı ornyna jańa oqý ǵımaraty salynady» - delingen Shymkent qalasy ákimdigi taratqan aqparatta.
Shyńǵysbaı qajy Dáýitulynyń shóberesi bolyp keletin Seıdahan Mamytov «meshit buzylyp jatyr» degen habardy estisimen-aq Tólebı aýdanynan arnaıy kelipti.
«Durys túsinińizder, meshit ornynda tur. Qosalqy ǵımrattyń aǵashtary qulap jaramaı qalǵan bolatyn. Sol jerler zaman talabyna saı retke keltirilip, qaıtadan oqý ǵımaraty salynatyn bolady» - dedi ol.
Aıta keteıik, búgin Shymkenttegi 135 jyldyq tarıhy bar meshittiń buzylyp jatqany jaıynda áleýmettik jelide vıdeo taraǵan bolatyn.
