Aqmoladaǵy gaz jarylysy: 16 zardap shegýshi elordada aýrýhanada jatyr

ASTANA. KAZINFORM – Astana qalasynyń Qoǵamdyq densaýlyq saqtaý basqarmasy gaz ballony jarylysynan zardap shekken adamdardyń qazirgi hali týraly málemetpen bólisti.

«Aqmola oblysy Qorǵaljyn aýdany Sabyndy aýylyndaǵy meshitte gaz jarylysynan zardap shekken 16 adam Astananyń qalalyq statsıonarlaryna jetkizildi. Onyń ishinde 13 eresek jáne 3 bala. 7 jábirlenýshi reanımatsııa bólimshesinde, 6 adam Astana qalasynyń №1 qalalyq aýrýhanasynyń polıtravma, endoprotezdeý jáne kombýstıologııa bólimshesine ornalastyryldy. Aldyn ala dıagnoz – ártúrli dárejedegi jalynnyń termııalyq kúıikteri», - delingen habarlamada. 

Odan bólek, 25-30% termııalyq kúıik shalǵan 3 bala qalalyq №2 balalar aýrýhanasynyń ORIT (qarqyndy terapııa bólimshesi) aýrýhanasyna jatqyzyldy. 

«Statsıonarda patsıentter kelgen boıda kombýstıolog, reanımatolog, terapevt, statsıonar boıynsha jaýapty dáriger qarady, travmatologtar, kombýstologtar toby qosymsha shaqyryldy. Zardap shekkenderge barlyq qajetti medıtsınalyq kómek kórsetiledi, patsıentterdiń jaǵdaıynyń dınamıkasy boıynsha aqparat jańartylady», - deıdi densaýlyq saqtaý basqarmasynan. 

Buǵan deıin habarlaǵanymyzdaı, Aqmola oblysynda burynǵy meshitte as berý kezinde gaz ballony jarylyp, úsh adam mert boldy.