Meshitte namaz ýaqytynda er adamdy «Ámın» dep aıtqany úshin uryp jibergen

ShYMKENT. KAZINFORM.  - Shymkentte meshitterdiń birinde bir top azamat ımamnyń eskertýine qaramastan jamaǵat namazyn buzǵan. Olar ózge óńirden kelgen.

Oqıǵa 12 mamyrda keshki aqsham namazy kezinde bolǵan. Bul sáttiń vıdeosy jelide paıda boldy. Onda ózgelermen qatar namaz oqyp turǵan er adamdy ekinshisi judyryqpen uryp jibergenin baıqaýǵa bolady.

Qazaqstan musylmandary Dinı basqarmasynyń málimetinshe, ózge mázhabta namaz oqyǵan bir top adam jamaǵat pen ımamnyń ótinishine qulaq aspaı, meshit erejesin óreskel buzǵan.

Namaz kezinde «Ámın» duǵasyn qatty daýyspen aıtqan jandardyń áreketine tózbegen meshitke turaqty kelýshi bir azamat olardyń birine qol jumsaǵan. Nátıjesinde ımam jamaǵat namazyn toqtatýǵa májbúr bolǵan.

«Oqys oqıǵa der kezinde toqtatylyp, polıtsııa qyzmetkerleri tıisti jumys júrgizgen. Qazaqstan musylmandary Dinı basqarmasy meshitke kelýshi jamaǵatty meshit erejesine baǵynýǵa, sonymen qatar qulshylyq úıinde sabyr saqtap, kórkem minez tanytýǵa shaqyrady», - delingen QMDB málimetinde.

Aıta ketsek, QMDB bekitken «Meshit erejesi» boıynsha Qazaqstan musylmandarynyń aýyzbirshiligi men birtutastyǵyn qamtamasyz etý úshin namaz ben dinı rásimder Ábý Hanıfa mázhaby boıynsha oryndalady.