Meshit beretin neke kýáligi resmı qujat emes, estelik qana – Nurlan ımam
Islam qundylyqtaryn TikTok arqyly nasıhattap, kópshilikke tanylǵan dindar, Astana qalasyndaǵy Yryskeldi meshitiniń bas ımamy Nurlan Baıjigituly nekeni meshit pen AHAJ-da qıǵyzýdyń aıyrmashylyqtary týraly pikir bildirdi, dep habarlaıdy Kazinform.
«Dinimizde nekelesý – mindetti amal. Otbasyn quryp, urpaq taratý – mańyzdy isterdiń ishindegi eń ulysy. «Úılenińder jáne kóbeıińder! Qııamet kúni úmmetimniń kóptigimen maqtanamyn» degen», - deıdi ol.
Imamnyń paıymynsha, neke Qazaqstan zańnamasyna saı tirkelý úshin AHAJ-ǵa baryp tirkelý durys. Al meshitte neke qıǵyzý bul rásimniń balamasy bola almaıdy. Óıtkeni, elimiz Konstıtýtsııa boıynsha zaıyrlylyq baǵytyn, zań ústemdigin ustanady.
«Elimizde meshitterde júrgiziletin dinı neke qııý rásimi dinı joralǵylardyń sanatyna jatady. Qıylǵan nekeni kýálandyratyn neke kýáligi nekelesýshilerge tek estelik retinde ǵana beriledi. Ol kýálik Qazaqstan Respýblıkasy, AHAJ bóliminen beriletin neke qujatyna teń keletin dárejedegi zańdy kúshke ıe emes. Osyǵan oraı, elimizdegi barlyq meshitterdegi neke qııý rásimi tek qana AHAJ bóliminiń tirkeýinen keıin júrgiziledi. Sebebi, nekelesýdiń arǵy jaǵynda zor jaýapkershilik, tereń talap, ómirlik urpaq turady», - deıdi Nurlan qajy Baıjigituly.
Imam meshitter qazir juptardan dinı jolmen neke qımaı turyp AHAJ bóliminde tirkelip kelýdi talap ete bastaǵanyn aıtady.
«Neke ystyq sezim ǵana emes. Keıbir jasyryn nekelesetinder bar. Biz jasyryn túgili, tipti zańdy memlekettik otbasy bolyp tirkeýden ótýdi talap etýge kóshtik. Nege? Sebebi, otyz jyl ishinde osy musylman nekesimen qanshama qym-qıǵash qurylǵan jas otbasylar men saldarynan týyndaǵan jaman jaǵdaılardyń kýási bolyp keldik. Sondyqtan, nekelesýdi ashyq túrde, ıaǵnı jarııa túrde jasaý kerek. Ásili, nekeniń sharty da jarııalylyq. Ásirese, eki jastyń ata-analary, týǵan-týystary bilgeni jón. Qazaqy dástúrdi qoldansa, múldem jaqsy. Syrǵa salý, qyz uzatý degen uly qazaqy salttan ótkeni eki jasqa da, eki jaqqa da jaqsy. Jalpy, nekege salmaqty oımen kelse eken dep aıtqan bolar edim. Bylaı túsineıik, zańsyz neke zańsyz áreketpen teń. Al, zańsyz áreket qylmyspen teń. Sol sııaqty, tek «Talaq, talaq, talaq» dep, áıeli men bala-shaǵasyn tastap, jaýapkershilikten qashqan ákelerdiń tirligi qoǵamnyń buzylýyna ákelip jatyr. Sondyqtan, zańdy nekege otyrý sheshimi qazaq qoǵamy úshin asa qajet ári ózgerissiz qalady», - dedi Nurlan Baıjigituly.
Aıta keteıik, buǵan deıin Ádilet mınıstri Azamat Esqaraev nekeni meshitte ǵana qııýdyń saldary týraly pikir bildirgen bolatyn.
