Meshitterde sadaqa termınaldar arqyly qabyldanady

ASTANA. QazAqparat - Qazaqstan musylmandary dinı basqarmasy meshitterge termınal ornatý arqyly jarııalylyqqa kóshýdiń alǵashqy qadamyn jasady, dep habarlaıdy QazAqparat tilshisi.

Musylman qaýym asyǵa kútken qasıetti Ramazan aıynyń aıaqtalýyna da sanaýly kúnder qaldy. Ramazan aıynda oraza ustaýdan bólek jaǵdaıy bar adamdar pitir sadaqa berýge mindetti. Bıylǵy pitir sadaqa kólemi 300 teńge. Buǵan deıin pitir sadaqa meshitterde qolma-qol nemese arnaıy  jáshikter arqyly berilse, endi termınaldar arqyly aýdarý múmkindigi bar.

Bul týraly «Meshitterge sadaqa termınaldary ornatylýda. Meshittiń esep-shotyna túsken qarjy qaıyrymdylyq sharalar men qulshylyq úıiniń kommýnaldyq shyǵyndary men din qyzmetkerleriniń jalaqysyna, ǵylymı, ıgi jobalarǵa jumsalady. Bul - qolma-qol aqshadan arylý degen sóz. Múftııattyń bul bastamasy kezeń-kezeńimen júzege asatyn bolady», -  dep habarlady Qazaqstan musylmandar dinı basqarmasynyń baspasóz qyzmetiniń jetekshisi Aǵabek Qonarbaıuly.

Aıta ketsek, sońǵy jyldary meshit qarajatynyń ashyq kórsetilmeıtini, ımamdardyń Ramazan aıynda berilgen sadaqa mólsheri men onyń jumsalýy týraly esep bermeıtini jaıynda áleýmettik jelide halyq jıi talqylaǵan bolatyn.

Osy oraıda jýyrda májiliste maquldanǵan «Dinı qyzmet jáne dinı birlestikter máseleleri» týraly zań negizinde barlyq dinı birlestikter jylyna bir ret BAQ arqyly túsken sadaqa men qaıyrymdylyq kómek týraly esep berýge mindetteldi.