Meshittegi sadaqa jáshigin tonaǵan Túrkistan oblysynyń turǵyny ustaldy
TARAZ. QazAqparat – Jambyl oblysynda meshittegi sadaqa jáshiginen aqsha urlaǵan kúdikti ustaldy, - dep habarlaıdy QazAqparat tilshisi.
T.Rysqulov aýdandyq polıtsııa bólimine Kókdónen aýylynyń meshit ımamy xabarlasyp, túngi ýaqytta belgisiz adamdardyń meshittiń ishine terezesin syndyryp kirip, sadaqa jáshiginen jınalǵan aqshany urlap ketkeni týraly aıtty.
Atalǵan derek boıynsha aýdandyq polıtsııa bóliminiń qyzmetkerlerimen jedel-izdestirý sharalaryn júrgizý barysynda 32 jastaǵy Túrkistan oblysynyń turǵyny anyqtalyp, ustaldy. Ol óz kinásin moıyndady jáne ýaqytsha ustaý ızolıatoryna qamaqqa alyndy.
Qazirgi ýaqytta QR Qylmystyq kodeksiniń 188-baby 3-bóligi 3-tarmaǵymen qylmystyq is qozǵalyp, sotqa deıingi tergeý amaldary júrgizilýde.
