Meshitke kelgen 25 adam jumysqa ornalasý múmkindigine ıe boldy

ASTANA. QazAqparat - Astanada meshitterde jumysqa ornalasý boıynsha keńes berý tájirıbesi qolǵa alyndy. Aptasyna eki ret - beısenbi jáne juma kúnderi saǵat 12:00-den 15:00-ge deıin elordalyq Jumyspen qamtý ortalyǵynyń mamandary kelýshilerge jumys tabýǵa kómektesetin bolady, dep habarlaıdy QazAqparat elorda ákimdiginiń saıtyna silteme jasap.

Osy ýaqytqa deıin Jumyspen qamtý ortalyǵynyń qyzmetkerlerine 200-den asa adam júgingen, sonyń 25-i mamandyqtary boıynsha jumysqa turýǵa joldama aldy.

«Joldamamen birden jumys berýshige barǵan durys. Kóbinese jumyssyzdar ekinshi, úshinshi kúnderi baryp, bos jumys ornynan aıyrylyp qalady. Búgin maǵan 15 adam kómek surap keldi, beseýi joldama aldy», - deıdi «Áziret Sultan» meshitinde jumys júrgizip jatqan Jumyspen qamtý ortalyǵynyń mamany Qanat Jumabaev.

Onyń aıtýynsha, osy kúnge deıin eńbek naryǵynda elektrık, slesar, dánekerleýshi sııaqty tehnıkalyq mamandyqtarǵa suranys joǵary.

Jumyspen qamtý ortalyǵynyń málimetter bazasynda ózekti bos jumys oryndaryn usynýmen aınalysatyn mobıldi toptar meshitterden basqa Ortalyq bazarda, «Shanhaı» bazarynda jumys isteıdi.