Meshitke dońyzdyń óleksesin tastap ketken
ASTANA. 9 jeltoqsan. QazAqparat - Amerıkalyq Hıýston qalasynyń mańyndaǵy meshitke belgisiz bireýler aqsham men quptan namazdarynyń arasynda qara dońyzdyń óleksesin laqtyryp ketipti.
Hıýston musylmandarynyń belsendisi Іlııas Qudrıdiń aıtýynsha, parsha-parshasy shyqqan dońyzdyń óleksesin Islam oqý-aǵartý ortalyǵynyń jamaǵaty taýyp alǵan. Musylman dıasporasynyń jetekshisi muny Islamǵa degen jekkórinish nıetinen týǵan áreket deıdi. «Mundaı sumdyqty eshkim kútpegen edi», - deıdi ol.
Muny istese, musylmandar úshin dońyz etiniń haram ekenin biletin Islamǵa qany qas adamdar isteıdi dep esepteıdi musylmandar dıasporasy.
«Budan Islamdy jek kóretin adamdardyń qoltańbasyn baıqaýǵa bolady. Ádette mundaı soraqy áreketterge osyndaı sebeptermen barady», - dedi Amerıka-ıslam qatynasyna jaýapty keńestiń ókili Mustafa Kerrol.
Islam oqý-aǵartý ortalyǵynyń ókilderi Hıýstonda mundaı jaǵdaıdyń buǵan deıin eshqashan bolmaǵanyn aıtady.
Jergilikti tártip saqshylary osy oqıǵaǵa qatysty tergeý-tekserý amaldaryn bastady, dep habarlaıdy muslim.kz.
