Meshit jáshikterine túsken sadaqa qaıda jumsalady
ASTANA. QazAqparat - Qazaqstan musylmandary Dinı basqarmasynyń naıb múftıi, «Nur Astana» ortalyq meshitiniń Bas ımamy Naýryzbaı Ótpenov meshit jáshikterine túsetin qarajattyń qaıda jumsalatynyn aıtyp berdi, dep habarlaıdy «QazAqparat» HAA tilshisi.
«Qoǵam bolǵan soń, túrli pikirdiń bolatyny zańdylyq. Qazirgi ýaqytta múftııatqa qarasty 2 500-den astam meshit bar. Onyń bes júzge jýyǵy ózin-ózi qamtamasyz ete alady. Túsken sadaqamen kommýnaldyq shyǵyndaryn óteıdi, qyzmetkerlerine jalaqy beredi. Qalǵan eki myńnan astam meshit demeýshilerdiń kómegine muqtaj. Bul meshitterdi demeýshilerge hat jazyp, halyqtan kómek suraý arqyly ustap otyrmyz», - dedi Naýryzbaı Ótpenov Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, sadaqaǵa túsken qarajat meshit shyǵyndary men qyzmetkerlerdiń aılyq jalqasyn tóleýden artylmaıdy.
«Árıne, berilgen sadaqanyń bul dúnıede de, o dúnıede de suraýy bolady. Muny kez kelgen ımam jaqsy túsinedi. Sadaqa jáshikteriniń 10 adamnan quralǵan arnaıy komıssııasy bar. Komıssııa quramynda aqsaqaldar, qoǵam qaıratkerleri bar. Olar jáshiktegi aqshany sanap alyp, býhgalterııaǵa ótkizedi. Býhgalterııa qarajatty bankke tapsyrady. Bank arqyly meshittiń kommýnaldyq shyǵyndary men qyzmetkerlerdiń eńbekaqylary tólenedi. Áıtse de, is júzinde jáshikke jınalǵan qarajat meshit shyǵyndaryn óteýge jetkiliksiz», - deıdi ol.
Sonymen birge, QMDB ókili mamyr aıynda qurylǵan «Ýaqyp» qorporatıvtik qaıyrymdylyq qoryna úmit artyp otyrǵandaryn jasyrmady. Din mamandarynyń biliktiligin kóterý jáne shalǵaıda ornalasqan dinı birlestikterdiń áleýmettik máselelerin sheshý - qordyń basty mindetteriniń biri.
