Meshit qyzmetkerleri aqtóbelikterdiń ynsapsyzdyǵyna keıis bildirdi
AQTÓBE. QazAqparat - Aqtóbelikter ortalyq meshit aparyp bergen kıim-keshekti iriktep, qajetin alǵan soń barlyǵyn dalaǵa shashyp ketken. Sý tasqyny kezinde zardap shekken otbasylarǵa arnalǵan kıimderdi aıaǵymen taptap júrgenderdiń isin kórgen meshit qyzmetkerleri turǵyndardyń jaýapsyzdyǵyna renish bildirdi, dep habarlaıdy QazAqparat tilshisi.
Aqtóbedegi sý tasqyny kezinde zardap shekkender Qýraıly, Sazdy, Órleý, Qyzyljar aýyldarynda úı salyp jatyr. «Nur Ǵasyr» ortalyq meshiti zardap shekkenderge arnap «Sen de úles qos» aktsııasyn ótkizip, kıim-keshek, turmystyq zattardy jınaǵan. Qaıyrymdylyq istiń arty daýǵa aınaldy. Aqtóbelikter meshit aparǵan kıimderdi dalada iriktep, aralap júrgen adamdardyń sýretin áleýmettik jelige salyp, tegin kıimdi alýǵa keńes bergen. Al bul sýret kópshiliktiń talqysyna túsip, jeli qoldanýshylary qaıyrymdylyq istiń belgili bir mekenjaıǵa aparylýy qajet ekenin aıtty. Bul is týraly «Nur Ǵasyr» ortalyq meshiti óz pikirin bildirdi.
«Osydan bir apta buryn «Nur Ǵasyr» oblystyq ortalyq meshiti «Sen de úles qos» qaıyrymdylyq aktsııasynyń aıasynda tasqynnan zardap shekken otbasylarǵa qaıyrymdylyq kómek kórsetti. Atap aıtqanda, Qyzyljar aýylynda turatyn bes otbasyǵa kilemder men tósenishter, kórpe-jastyqtar, kıim-keshekter berildi. Meshitte qaıyrymdylyqqa arnalǵan zattardy jınaqtaıtyn arnaıy bólme bar. Bul joly Qyzyljardaǵy turǵyndardyń kelisimimen tıisti kómek sol aýylǵa jetkizildi. Sómkelerdi úılerdiń birine kirgizetindeı múmkindik bolmady. Sebebi, árqaısysynda jóndeý jumystary júrip jatyr eken. Bes úıdiń óz jıhazdary aýlada úıilip tur. Kıimderdiń ishinen ár otbasy ózine qajettisin qarap, iriktep aldy. Onyń ishinde, jańa kıimder de bar. Bir-eki kún ishinde belgisiz bireýler sómkelerdi ashyp, tóńirekke shashyp ketken. Olar ózderine qajetti kıimderdi alǵan bolýy yqtımal. Bir ǵana jaǵymsyz sýret qoǵamda meshit pen din qyzmetkerleri týraly teris oı-pikirdiń qalyptasýyna sebep bolyp otyr», - dep habarlady Aqtóbe oblystyq ortalyq «Nur Ǵasyr» meshitiniń baspasóz qyzmeti.
