Merziminen buryn bostandyqqa shyqqan Kentaýdyń eks-ákimi túrmege qaıta qamaldy

Osydan eki aı buryn bostandyqqa shyqqan Kentaý qalasynyń burynǵy ákimi Dáýren Maqajanov qaıtadan kolonııaǵa jiberildi, dep habarlaıdy Kazinform.

Almaty oblysy sotynyń málimetine súıensek, búginde Maqajanov jazasyn odan ári óteý úshin ІІM qylmystyq-atqarý júıesi komıtetiniń «№64 mekemesine» jetkizildi.

Vedomstvodan atap ótkendeı, buǵan deıin Qonaev qalalyq soty Maqajanovqa qatysty jazanyń ótelmegen bóligin neǵurlym jeńil jaza túrine aýystyrý týraly qaýly shyǵarǵan bolatyn. Alaıda Almaty oblystyq soty bul qaýlynyń kúshin joıdy.

Sot jańa qaýlyny oryndaý úshin Astana polıtsııa departamentine jiberdi.