Merzimdi qyzmettegi sarbazdar marapattalyp, oqý oryndaryna joldama aldy
ASTANA. KAZINFORM – Radıoelektronıka jáne baılanys áskerı-ınjenerlik ınstıtýtynda merzimdi qyzmettegi sarbazdardy zapasqa shyǵarýǵa arnalǵan saltanatty rásim ótti. Bul týraly Qorǵanys mınıstrliginiń baspasóz qyzmeti habarlady.
Áskerı joǵary oqý ornynyń kúzgi shaqyrylymdaǵy qaraýyl rotasynyń jaýyngerleri óz mindetterin abyroımen atqaryp, qyzmetterin laıyqty deńgeıde aıaqtady.
Olardyń eńbegi elenip, árbir sarbazǵa alǵys hattar men baǵaly syılyqtar tabystaldy. Jyl ishinde qyzmetimen erekshelengen áskerı qyzmetshilerge kezekti áskerı ataqtar berildi.
Bul shaqyrylymda jaýyngerlik jáne kásibı daıarlyqta joǵary nátıjeler kórsetken alty sarbaz bilim granttaryna ıe boldy. Onyń beseýi Qazaqstan Respýblıkasy Qorǵanys mınıstrliginiń áskerı joǵary oqý oryndarynda bilimin jalǵastyrsa, bireýi ál-Farabı atyndaǵy Qazaq ulttyq ýnıversıtetine oqýǵa túsetin boldy. Sonymen qatar tórt sarbaz Qarýly kúshter qatarynda kelisimshart negizinde qyzmetin jalǵastyrýǵa sheshim qabyldady.
– Qyzmet men úshin mańyzdy ómirlik beles boldy. Ol maǵan azamattyq boryshymdy óteýge múmkindik berip, joǵary oqý ornyna jol ashty. Qoldaý kórsetkeni jáne ósýge jaǵdaı jasaǵany úshin Qorǵanys mınıstrligine alǵys aıtamyn, – dedi merzimdi qyzmettiń qatardaǵy jaýyngeri Dılıar Zııaýdınov.
Radıoelektronıka jáne baılanys áskerı-ınjenerlik ınstıtýty qaraýyl rotasy qurylǵannan beri merzimdi qyzmettegi on tórt sarbaz bilim grantyna ıe boldy. On besi Qorǵanys mınıstrliginiń áskerı joǵary oqý oryndaryna oqýǵa túsken, al beseýi kelisimshart boıynsha qyzmetin jalǵastyrǵan.
Aıta ketelik Aqtaý garnızonda 600-den astam teńiz jaıaý áskeri jaýyngerlik synaqtan ótti.