Merzimdi áskerı qyzmetten ótpegen azamattar áskerı mamandyq alyp, áskerı bılet ıelene alady

Baǵdarlamaǵa túrli sebeptermen merzimdi áskerı qyzmetten ótpegen 24-27 jas aralyǵyndaǵy áskerge shaqyrylýshylar jáne áskerı qyzmetke jaramdy nemese densaýlyǵyna baılanysty bolmashy shekteýleri bar áskerı mindettiler qabyldanady.

Oqýǵa ótinish eGov.kz portaly arqyly beriledi. Ol úshin «Áskerı esep jáne qaýipsizdik» bólimindegi «Áskerı-tehnıkalyq jáne ózge de mamandyqtar boıynsha daıarlaýǵa jiberý úshin áskerge shaqyrylýshylar men áskerı mindettilerdi kezekke qoıý» memlekettik qyzmetin paıdalaný qajet.

«Áskerı-tehnıkalyq mektepterde azamattar áskerı, materıaldyq-tehnıkalyq qamtamasyz etý baǵyttary boıynsha suranysqa ıe mamandyqtardy meńgeredi. Olardyń qatarynda logıstıka mamandary, avtokólik jáne saýytty tehnıkany jóndeý sheberleri, avtoelektrıkter, akkýmýlıatorshylar, gaz jáne elektr dánekerleýshiler, aspazdar men naýbaıshylar bar. Sonymen qatar Qarýly kúshterdiń qajettiligi úshin pılottyq rejımde ushqyshsyz avıatsııalyq júıeler operatorlaryn daıarlaý baǵdarlamasy júzege asyrylyp jatyr», – dep habarlady Qorǵanys mınıstrligi.

Vedomstvonyń málimetinshe, 2026 jyly bir mamandyq boıynsha oqytý quny 545 myń teńgeni quraıdy. Oqý merzimi tańdalǵan mamandyqqa baılanysty orta eseppen 40-46 kún aralyǵynda.

Oqý kezeńinde tyńdaýshylar áskerı kıimmen, jatyn orynmen jáne kúnine úsh mezgil tamaqpen qamtamasyz etiledi. Sonymen birge olardyń jumys orny men atqaryp otyrǵan laýazymy saqtalady.

Oqýdy aıaqtaǵan túlekter áskerı ant qabyldap, sertıfıkat pen áskerı bılet alady. Sondaı-aq olarǵa «qatardaǵy jaýynger» áskerı ataǵy beriledi.

Áskerı-tehnıkalyq mektepterde bilim alǵan azamattar áskerı daıarlanǵan rezerv quramyna engizilip, merzimdi áskerı qyzmetke shaqyrylmaıdy.

Aıta keteıik, buǵan deıin Qarýly kúshterde jańa transformatsııa ortalyǵy iske qosyldy.