Merzimdi áskerı qyzmetti jasaqtaý máselesi kúrdelenip barady – Aıgúl Quspan
ASTANA. KAZINFORM –. Premer-mınıstrdiń orynbasary – Mádenıet jáne aqparat mınıstrine saýal joldaǵan Májilis depýtaty Aıgúl Quspan áskerı qyzmetti tańdaıtyn jastardyń sany jyldan jylǵa azaıyp bara jatqanyna alańdaýshylyq tanytty.
- Áskerge deıingi daıyndyq - jastarymyzdyń eldik, erlik sanasyn qalyptastyryp damytýǵa jáne Otan aldyńdaǵy qasıetti boryshyn oryndaýǵa zor yqpal etedi. Bul salada sheshýshi faktor - formaldy túrde qamtý kórsetkishteri emes, daıyndyqtyń shynaıy sapasy. «El bolamyn deseń – besigińdi túze» degen ulaǵatty sóz dál osy tusta salmaqty da ardaqty tuǵyrda. Ýákiletti memlekettik organdardyń málimetine súıinsek, elimizde áskerı-patrıottyq úıirmeler men klýbtardyń keń jelisi qalyptasqan. Onda jyl saıyn jastardy keńinen qamtıtyn túrli is-sharalar ótkizilýde. Alaıda, sońǵy jyldary merzimdi áskerı qyzmetti jasaqtaý máselesi kúrdelenip bara jatqany, shyndyq. Oǵan qosa, áskerı qyzmetti sanaly túrde ómiriniń ózegi, negizi etip tańdaǵan jastardyń sany jyldan jylǵa azaıyp barady, - dedi depýtat.
Onyń paıymynsha, bul kórinis atqarylyp jatqan sharalar tıimdiliginiń jetkiliksiz jáne munda formalızmniń keń oryn alǵanyn kórsetedi. Osy olqylyqtardy joıý maqsatynda 2025 jyldyń 16 shildesinde áskerı-patrıottyq tárbıe men áskerge deıingi daıyndyqty birtutas ári júıeli modelin qalyptastyrýǵa baǵyttalǵan zańnamalyq ózgerister qabyldandy. Zań aıasynda salalyq zańnamalar ózara úılestirilip, azamattardy áskerı qyzmetke daıarlaýdyń nysandary naqtylanyp, keńeıtildi. Atalǵan ózgerister tolyq túrde shynaıy iske asqan jaǵdaıda, orta bilim berý uıymdarynyń barlyǵyn, onyń ishinde mamandyrylǵan áskerı mektepterdi , oǵan qosa áskerı-patrıottyq birlestikterdi qamtyp, olardyń daıyndyq sharalaryna, esepke alý júıesine, qol jetkizgen tabystaryn baǵalaýǵa jáne biryńǵaı talaptardy nátıjeli júrgizýge múmkindik beredi.
- Alaıda, quqyqtyq túsindirý jumystarynyń álsizdigi, sondaı-aq jekelegen ýákiletti organdar tarapynan oryndaýshylyq tártiptiń tómendigi, atalǵan zań normalarynyń bytyrańqy bereketsizdigine, baıaý iske asýyna ákelip, olardyń ómirlik máni bar nátıjesine keri áserin tıgizýde. Áskerge deıingi daıyndyqty damytý – ulttyq qaýipsizdikti nyǵaıtýdyń jáne balǵyn jastardyń azamattyq jaýapkershiligin qalyptastyrýdyń mańyzdy baǵyttarynyń biri ekenin Táýelsizdik alǵan jyldarymyzda ábden tanydyq. Osyǵan oraı, qysqa merzimde oıy men boıy, jany men qany shyńdalǵan, otan súıgish jastardy daıyndaımyz desek qazirden bastap barlyq múddeli memlekettik organdardyń birlesken kúsh-jigerimen aýqymdy uıymdastyrýshylyq, ádistemelik jáne basqarýshylyq jumystardy júrgizý aýadaı qajet. «Birlik bar jerde – tirlik bar» qaǵıdatyn basshylyqqa ala otyryp, halyq arasynda bilim berý uıymdary men jastar birlestikteri arasynda áskerge deıingi daıyndyqtyń jańa talaptaryn, onyń mańyzy men bolashaǵy jóninde maqsatty ári júıeli quqyqtyq-túsindirý jumystaryn sapaly, nátıjeli túrde júrgizý qajet, - dedi Aıgúl Quspan.
Buǵan deıin Oqý-aǵartý men Qorǵanys mınıstrligi oqýshylarǵa arnalǵan birlesken áskerı jıyndar ótkizetinin jazǵan edik.