Merzimdi áskerı qyzmetke shaqyrý tártibine qandaı ózgerister engizildi
QARAǴANDY. KAZINFORM — Qaraǵandy oblysynda merzimdi áskerı qyzmetke shaqyrý tártibine birqatar ózgeris engizildi. Endi jas azamattardy áskerı bólimderge attandyrmas buryn olardyń densaýlyǵymen qatar, psıhoemotsıonaldyq jaǵdaıy da jiti baǵalanady. Bul bolashaq sarbazdyń ózine jáne birge qyzmet etetin joldastaryna qaýip tóndirýi múmkin faktorlardy aldyn ala anyqtaýǵa múmkindik beredi.
Qaraǵandy oblysynyń qorǵanys isteri departamenti ókilderi azamattardy merzimdi áskerı qyzmetke shaqyrý tártibi men keıingi jyldary engizilgen ózgerister týraly aıtyp berdi. Áskerı bólimge jóneltiler aldynda árbir shaqyrylýshy medıtsınalyq komıssııadan ótip qana qoımaı, psıhologııalyq testileýden de ótedi.
Merzimdi áskerı qyzmetke 18-den 27 jasqa deıingi, áskerı qyzmetke shaqyrýdy keıinge qaldyrýǵa nemese odan bosatylýǵa quqyǵy joq er azamattar shaqyrylady. Áskerı qyzmetshiler ásker túrine qaraı Qazaqstan Respýblıkasynyń Qarýly kúshteri, Іshki ister mınıstrligi, Tótenshe jaǵdaılar mınıstrligi, Ulttyq qaýipsizdik komıtetiniń Shekara qyzmeti nemese Memlekettik kúzet qyzmeti qataryn tolyqtyrýy múmkin.
Qazirgi shaqyrý naýqany aıasynda Qaraǵandy oblysynan merzimdi áskerı qyzmetke 1 200 adamdy attandyrý josparlanyp otyr.
Áskerge shaqyrylýshylardy irikteý barysyndaǵy negizgi kezeńderdiń biri — medıtsınalyq komıssııadan ótkizý. Budan bólek, 2025 jyldyń kúzinen bastap «PSY-Rısk» psıhologııalyq testileýi qoldanylady. Onyń kómegimen jas azamattyń psıhoemotsıonaldyq jaı-kúıi baǵalanady.
— Bul ádisteme psıhoemotsıonaldyq turaqsyzdyq pen sýıtsıdtik beıimdilik belgilerin erte kezeńde anyqtaýǵa baǵyttalǵan. Bul óz kezeginde áskerı qyzmetshilerdiń qaýipsizdigin arttyryp, áskerı bólimderde salaýatty moraldyq-psıhologııalyq ahýal qalyptastyrýǵa yqpal etedi, — dedi Qaraǵandy oblysynyń Qorǵanys isteri departamenti Áskerge shaqyrý jáne áskerden tys jumystar basqarmasynyń bastyǵy Dmıtrıı Býksman.
Osylaısha, áskerı qyzmetke irikteý kezinde jas azamattyń dene daıyndyǵy men densaýlyq jaǵdaıy ǵana emes, onyń psıhologııalyq turǵydan qyzmetke qanshalyqty daıyn ekeni de eskeriledi. Jańa tásildiń negizgi maqsaty — áskerı qyzmet barysynda týyndaýy múmkin táýekelderdiń aldyn alyp, áskerı bólimderdegi moraldyq-psıhologııalyq ahýaldy turaqty ustaý.
Áskerge shaqyrylýshylarǵa áskerı komıssııaǵa kelý qajettigi shaqyrý qaǵazy, SMS-habarlama nemese elektrondyq úkimet portalyndaǵy jeke kabıneti arqyly habarlanady.
Sonymen birge zańnamada áskerı qyzmetke shaqyrýdy keıinge qaldyrý múmkindigi qarastyrylǵan. Ol, atap aıtqanda, otbasylyq jaǵdaıǵa, densaýlyq jaǵdaıyna, bilimin jalǵastyrý qajettiligine jáne zańda kózdelgen basqa da negizder boıynsha berilýi múmkin.
Merzimdi áskerı qyzmet ótkerý kezinde sarbazdar tolyqtaı memleket qamtamasyz etýinde bolady.
Áskerı boryshyn ótep, zapasqa shyǵarylǵannan keıin de azamattarǵa birqatar qoldaý sharalary qarastyrylǵan. Atap aıtqanda, olar nesıe tólemderin keıinge qaldyrý múmkindigin paıdalana alady, UBT tapsyrmaı-aq, otandyq joǵary oqý oryndaryna túsýge, jumysshy mamandyǵyn meńgerýge jáne jumysqa ornalasýǵa kómek alýǵa quqyly.
Buǵan deıin Astanadan alǵashqy áskerge shaqyrylýshylardyń Ulttyq qaýipsizdik komıtetiniń Shekara qyzmetine attanǵany habarlanǵan bolatyn.
