Merzimi ótken júrgizýshi kýáligin endi onlaın aýystyrýǵa bolady

ASTANA. KAZINFORM — Qazaqstandyqtar sáýir aıynan bastap júrgizýshi kýáligin onyń jaramdylyq merzimi aıaqtalǵannan keıin de eGov.kz portaly jáne eGov Mobile mobıldi qosymshasy arqyly aýystyra alady, dep habarlaıdy JI jáne tsıfrlyq damý mınıstrliginiń baspasóz qyzmeti.

Buǵan deıin qyzmet tek qoldanystaǵy qujat bolǵan jaǵdaıda, sondaı-aq ony joǵalýy, urlanýy nemese tegi, aty-jónin ózgertken kezde ǵana onlaın formatta kórsetiletin. Endi ol qujat merzimi ótken jaǵdaılardy da qamtıdy.

— Jańashyldyq júrgizýshi kýáliginiń barlyq sanatyna qoldanylady. Jaramdylyq merzimi ótkennen keıin kýálikti aýystyrý kezinde kólik quralyn basqarýǵa ruqsat alý úshin mindetti túrde medıtsınalyq tekserýden ótý qajet. Medıtsınalyq tekserýden ótken paıdalanýshylardyń málimetteri ótinim berý sátinde memlekettik aqparattyq júıelerden avtomatty túrde júkteledi. Al eger paıdalanýshy kýálikti merzimi aıaqtalǵanǵa deıin aldyn ala aýystyrsa, medıtsınalyq tekserýden ótý talap etilmeıdi. Qyzmet kórsetý merzimi — 60 mınýt, — deıdi mamandar.

eGov.kz portaly arqyly qyzmetti alý úshin:

— portalǵa kirip, «Azamattarǵa» — «Kólik jáne kommýnıkatsııalar» — «Avtomobıl kóligi» bólimine ótý;

— «Júrgizýshi kýáligin alý» qyzmetin tańdaý;

— daıyn qujatty alý úshin HQKO-ny kórsetý jáne fotosýretti júkteý (fotoǵa qoıylatyn talaptarmen tanysý);

— qoltańba úlgisin júkteý jáne baılanys telefonyn engizý;

— memlekettik baj salyǵyn tóleý (1,25 AEK). Qaıta ótinim bergen jaǵdaıda «Buryn tólengen» fýnktsııasyn paıdalanýǵa bolady;

— ótinimdi qol qoıýdyń qoljetimdi tásilderiniń birimen rastaý.

eGov Mobile qosymshasy arqyly qyzmetti alý úshin:

— qosymshaǵa kirip, «eGov Memlekettik qyzmetter» — «Júrgizý jáne kólik» bólimine ótý;

— «Júrgizýshi kýáligin berý» qyzmetin tańdaý;

— fotoǵa qoıylatyn talaptarmen tanysyp, faıldy júkteý;

— qoltańba úlgisin júkteý nemese jazyp, «Saqtaý» batyrmasyn basý;

— daıyn qujatty alý úshin HQKO bólimin tańdap, «Jalǵastyrý» batyrmasyn basý;

— memlekettik baj salyǵyn tóleý (1,25 AEK). Qaıta ótinim bergen jaǵdaıda «Buryn tólengen» fýnktsııasyn paıdalanýǵa bolady;

— ótinimdi qoljetimdi tásilderdiń birimen qol qoıý.

Qyzmet nátıjesi eGov.kz portalyndaǵy Jeke kabınettegi «Habarlamalar» bóliminde jáne eGov Mobile qosymshasyndaǵy «Habarlamalar» — «Jeke kabınet tarıhy» bóliminde kórsetiledi. Daıyn qujatty rásimdeý kezinde tańdalǵan HQKO-dan, jeke kýálikti usyný arqyly, alýǵa bolady.

— Jaqyn arada júrgizýshi kýáligin aýystyrý qyzmetin tolyqtaı onlaın formatqa kezeń-kezeńimen kóshirý josparlanyp otyr. Aǵymdaǵy jyldyń sáýir aıynan bastap ótinimderdi elektrondy túrde berý tásiline basymdyq beriledi, bul HQKO-ǵa barýdan bas tartyp, ondaǵy kezekterdi azaıtýǵa múmkindik beredi. Qyzmettiń onlaın formatta burynnan qoljetimdi ári suranysqa ıe ekenin eskersek, bul qadam protsesti tsıfrlandyrýdyń qısyndy jalǵasy bolmaq, — dedi Tsıfrlyq damý jáne jasandy ıntellekt vıtse-mınıstri Rostıslav Konıashkın.

Fotosýretti júkteý kezinde belgilengen talaptardy saqtaý mańyzdy. Sýret formaty sapa parametrlerine sáıkes bolýy tıis. Tolyq talaptar tizimimen eGov.kz portalyndaǵy qyzmet pasportynan tanysýǵa bolady.

Sonymen qatar, buryn berilgen jeke kýáliktegi nemese tólqujattaǵy fotosýretti paıdalaný múmkindigi bar. Bul jaǵdaıda sýret alynatyn qujat úsh jyldan aspaıtyn merzimde berilgen bolýy tıis. Eger merzim úsh jyldan assa, júıe ózekti fotosýretti qolmen júkteýdi usynady.

Ótinim berý barysynda keıbir jaǵdaılarda paıdalanýshy qujatynyń derekteri memlekettik aqparattyq júıelerde tsıfrlandyrylmaǵan bolýy múmkin. Mundaı jaǵdaıda tıisti habarlama kórsetiledi jáne derekterdi jańartý úshin HQKO-ǵa jeke júginý qajet bolýy yqtımal.

Sondaı-aq júıe bereshekterdiń bar-joǵyn avtomatty túrde tekseredi. Eger júrgizýshiniń 30 kúnnen astam ýaqyt buryn salynǵan, tólenbegen aıyppuly bolsa, ol tolyq ótelgenge deıin kýálikti aýystyrý múmkin bolmaıdy.

Aıta ketý kerek, júrgizýshi kýáligin onlaın berý qyzmeti iske qosylǵan sátten bastap ony 60 000-nan astam ret paıdalanǵan. Fýnktsıonal QR Tsıfrlyq damý jáne jasandy ıntellekt mınıstrliginiń Memlekettik qyzmetter komıteti, «Ulttyq aqparattyq tehnologııalar» AQ jáne QR Іshki ister mınıstrliginiń birlesken jumysynyń nátıjesinde júzege asyryldy.

Buǵan deıin Shymkentte júrgizýshi kýáligin alý emtıhany kezinde avtokólik aýdarylyp ketkenin jazǵanbyz.