Merzimi ótken kredıtorlyq bereshek kólemi 10 mlrd teńgege deıin tómendetiledi
ASTANA. KAZINFORM – Áleýmettik medıtsınalyq saqtandyrý qory Qarjy mınıstrliginiń qaramaǵyna berilgennen keıingi birinshi kezektegi mindeti qarjylyq shyǵyndarǵa jol bermeý men qarajattyń maqsatty paıdalanýyn qamtamasyz etý boldy. Azamattardy emdeýge jumsalatyn qarajat medıtsınalyq uıymdarǵa kórsetilgen medıtsınalyq kómektiń negizdiligi men naqty kórsetilýine sáıkes jetýi tıis.
Qarjy mınıstrligi málimetinshe, júrgizilgen jumystyń 9 aıdaǵy nátıjesi boıynsha qarajattyń jylystaýyna ákep soǵatyn arnalar anyqtalyp, joly kesildi, 23,4 mlrd teńge kóleminde qarjylyq shyǵynnyń aldy alyndy. Qozǵalǵan qylmystyq ister aıasynda ónim berýshilerge zańsyz tólengen 7,9 mlrd teńgeden astam qarajatty qaıtarý jumystary júrgizilip jatyr.
Jasandy ıntellekt negizindegi antıfrod júıesin qosa alǵanda, jańa quraldardy qoldaný zańbuzýshylyq belgilerin aqsha aýdarylǵanǵa deıin anyqtaýǵa jáne negizsiz tólemderdiń aldyn alýǵa múmkindik beredi.
Únemdelgen jáne qaıtarylǵan qarajat medıtsınalyq kómekti tóleýge baǵyttaldy.
Alǵashqy ózgerister qazirdiń ózinde baıqalyp, medıtsınalyq uıymdarǵa baǵyttalatyn qarjy aǵyny ulǵaıdy.
Atap aıtqanda, medıtsınalyq uıymdardy qarjylandyrý lımıtteri ulǵaıyp, aýrýhanalarǵa medıtsınalyq kómek naqty kórsetilgennen keıin medıtsınalyq qyzmetterge aqy tóleý múmkindigi berildi. Medıtsınalyq uıymdarǵa kómek kólemin syzyqtyq shkalany qoldaný arqyly shekteý tájirıbesinen kezeń-kezeńimen bas tartý jumystary júrip jatyr.
Bul halyqqa josparly medıtsınalyq kómek kórsetý múmkindikterin keńeıtip, aýrýhanalardyń kredıtorlyq bereshegin azaıtýǵa yqpal etedi.
Qor bereshektiń jalpy somasyn tirkeýden árbir problemalyq klınıka boıynsha onyń týyndaý sebepterin taldaýǵa kóshti.
Jalpy, el boıynsha merzimi ótken kredıtorlyq bereshegi bar 68 medıtsınalyq uıym anyqtaldy. Olardyń árqaısysy boıynsha jergilikti atqarýshy organdardyń qatysýymen qarjylyq saýyqtyrýdyń naqty josparlary ázirlendi.
Osylaısha, kiris bóligin ulǵaıtý jáne qanaǵattandyrylmaǵan qajettilik rastalǵan jaǵdaılarda onyń kólemin túzetý esebinen 2026 jyldyń sońyna qaraı merzimi ótken kredıtorlyq bereshek kólemin 17 mlrd teńgeden 10 mlrd teńgege deıin tómendetý boljanyp otyr.
Bul nátıjeler turaqtanǵan saıyn patsıentter onyń naqty áserin medıtsınalyq kómek alý kezeginiń qysqarýy jáne qajetti emdi ýaqytyly alý múmkindiginiń artýy arqyly sezinýi tıis.
Pavlodardaǵy medıtsınalyq mekemelerdiń kredıtorlyq qaryzy azaımaı turǵanyn jazǵan edik.
