Merziminen buryn bolatyn Prezıdent saılaýy úsh aıdan keıin ótýi yqtımal- E. Ertisbaev
ASTANA. 31 qańtar. QazAqparat /Rýslan Ǵabbasov/ - Qazaqstandaǵy merziminen buryn bolatyn Prezıdent saılaýy úsh aıdan keıin ótýi yqtımal. Bul týraly búgin Aqordada Elbasynyń Qazaqstan halqyna jasaǵan úndeýinen keıingi brıfıngte Memleket basshysynyń keńesshisi Ermuhamet Ertisbaev aıtty.
Onyń paıymdaýynsha, «jaqyn arada, múmkin erteń Prezıdent óziniń usynysyn Parlamentke engizedi»
«Egerde men qatelespesem, Konstıtýtsııa boıynsha úsh aılyq merzimde prezıdenttik saılaý ótýi tıis. Atap aıtqanda, 1 mamyrda prezıdenttik saılaý ótýi múmkin. Sebebi, 1 mamyr - Qazaqstan halqynyń birligi kúni. Bul ataýly kún bolar edi»,-dedi E. Ertisbaev.
Memleket basshysy referendýmnan bas tartqanyna toqtalǵan ol: «Prezıdent óziniń prezıdenttik merzimin 2 jylǵa qysqartyp otyr. Menińshe, 3 aıdan keıin Prezıdent saılaýy ótedi. Bul barlyǵy úshin kútpegen sheshim. Sebebi, zalda otyrǵandardyń arasynda birde-bir adam Elbasy osyndaı sheshim qabyldaıdy dep oılamady. Bul barlyq synshylarǵa jaýap dep bilemin. Bul sózde esh ersilik joq. Sebebi, bul taqyrypqa baılanysty kóp syn bolǵan edi. Atap aıtqanda, osy jaǵdaı Memleket basshysynyń demokratııalyq qundylyqtardy ustanatynyn taǵy da kórsetip otyr. Al demokratııanyń ózegi saılaý bolyp tabylady»,-dedi.
