Merzimi ótken teńge banknottaryn aıyrbastaý merzimi ózgeredi
NUR-SULTAN. QazAqparat – Elimizde 2006 jylǵy úlgidegi nomınaly 2000, 5000 jáne 10000 teńgelik banknottardy aıyrbastaýǵa qatysty jańa sheshim qabyldanady. Bul jaıynda Májilis depýtattarynyń saýalyna QR Ulttyq banki tóraǵasy Erbolat Dosaevtyń jaýabynda aıtylǵan, dep habarlaıdy QazAqparat tilshisi.
«2006 jylǵy úlgidegi nomınaly 2000, 5000 jáne 10000 teńgelik banknottar 2006 jylǵy 15 qarashada aınalysqa shyǵaryldy jáne 2016 jylǵy 4 qazannan bastap zańdy tólem quraly bolýyn toqtatty. Ekinshi deńgeıdegi bankter men ulttyq poshta operatory 2016 jyldan bastap 12 aı ishinde jáne Ulttyq banktiń fılıaldary 2020 jylǵy 5 qazanǵa deıin joǵaryda kórsetilgen banknottardy qabyldap, ulttyq valıýtanyń qoldanystaǵy aqsha belgilerine aıyrbastady», - dedi Erbolat Dosaev.
Onyń atap ótýinshe, buǵan deıin Ulttyq bank barlyq azamattar eski banknottardy ýaqtyly aıyrbastaı almaýyna baılanysty 2006 jylǵy úlgidegi nomınaly 2000, 5000 jáne 10000 teńgelik banknottardy qabyldaý men aýystyrý merzimin 2021 jylǵy 1 aqpanǵa deıin uzartqan bolatyn. Endi, bul sheshimge taǵy ózgeris engizilgeli otyr.
«Sonymen qatar, Ulttyq bank kelip túsken azamattardyń ótinishterin eskere otyryp, sondaı-aq halyqaralyq tájirıbeni nazarǵa alyp, Ulttyq bank fılıaldarynyń 2006 jylǵy úlgidegi banknottardy jáne keıingi jyldary shyǵarylǵan banknottardy aıyrbastaýynyń merzimsiz kezeńin engizý týraly sheshim qabyldaıdy. Ulttyq banktiń aktilerine tıisti ózgerister engizilgennen keıin 2006 jylǵy úlgidegi banknottardy merzimsiz aıyrbastaý jónindegi aqparat Ulttyq banktiń resmı saıtynda jáne buqaralyq aqparat quraldarynda ornalastyrylady»,- dedi ol.
