Merzimdik qyzmette qaza tapqan áskerı qyzmetkerlerdiń otbasylaryna 500 AEK kólemindegi ótemaqy tólenýi tıis - №2484 áskerı bóliminiń ókili I.Sanın
TALDYQORǴAN. 26 qarasha. QazAqparat - Búgin Taldyqorǵan qalalyq sotynda Vladıslav Chelahtyń isi boıynsha sot tyńdaýy jalǵasady.
QR Áskerı sotynyń baspasóz qyzmetinen habarlaǵandaı, ótken juma kúni sot jábirlenýshilerdiń ókilderin suraýǵa kiristi. Olar ózderiniń qaza tapqan týystary, olardyń shekara jasaǵyndaǵy qyzmeti jáne jábirlenýshilerdiń týystarynyń «Arqankergende» bolǵan oqıǵa týraly qalaı estigenin baıandap, sondaı-aq sottalýshyǵa qatysty óz pikirlerin bildirdi. Osylaısha, jábirlenýshilerdiń ókilderi Sarınov, Ámirǵalıev, Qapanov, Súndetov Chelahtyń kináli ekenine senimdi bolsa, Reı, Іlııasov, Aqyshev, Qydyrálıev, Imenovtiń týystary ózderiniń pikirin sot jaryssózderi kezinde bildiretinderin málimdedi.
Sot aldynda sóz sóılegen kapıtan Kereevtiń jesiri Raıhan Tabyldyqyzy buǵan deıin Chelahqa bes mıllıon teńge kólemindegi moraldyq shyǵyndy óteý boıynsha usynǵan azamattyq talabynan bas tartatynyn málimdedi.
Sondaı-aq sot aldynda №2484 áskerı bóliminiń atynan sóz sóılegen Ivan Sanın túsinik berdi. 7 mıllıon 848 myń teńge kólemindegi materıaldyq shyǵyndy óteý týraly azamattyq talabyn tolyq qoldaǵan ol zań boıynsha merzimdik qyzmet atqarǵan qaza tapqan áskerı qyzmetkerlerdiń otbasylaryna 500 AEK túrinde, al ofıtserler men kelisimsharttaǵy sarbazdarǵa 5 jyldyq aqshalaı ótemaqy tólenýi tıis ekenin túsindirdi.
Budan keıin sotqa «Arqankergen» qosynyndaǵy qylmys týraly estilgennen keıin jedel-tergeý tobynyń oqıǵa ornyn qaraýynyń beınejazbalaryn usyndy.
Esterińizge sala keteıik, shekarashy V.Chelahtyń soty Taldyqorǵanda 19 qarashada bastalǵan edi. Ol QR Qylmystyq kodeksindegi segiz baby boıynsha aıyptalýda.
Sot otyrystary demalys jáne mereke kúnderinen basqa kún saıyn ashyq rejimde ótýde. BAQ ókilderi bolyp jatqan protsesti aýdıo jáne beınekórsetilimmen jabdyqtalǵan arnaıy zalda otyryp kórýde.
