Merýert Túsipbaeva syrǵasyn syıǵa tartty (FOTO)
ASTANA. QazAqparat - «Samǵa juldyz» dep atalatyn balalar men jasóspirimder arasyndaǵy án baıqaýynda qazylar quramynda ánshi Merýert Túsipbaeva saıysqa qatysýshy ónerli qyzǵa óz syrǵasyn syıǵa tartty, dep jazady baistars.kz.
«Bul jobanyń jetekshisi - Maıra Іlııasova. Baıqaýǵa kóptegen ónerli balalar qatysyp, irikteý kezeńi uzaqqa sozyldy. Ár túrli aýdandardan kelgen ónerpazdardyń barlyǵy da keremet. Maıra apaı, qazylar alqasynyń árbir múshesine, ózderine unaǵan qatysýshyǵa jeke syılyq tabystaýdy tapsyrdy. Ózim gastroldermen júrip, bul jaıly umytyp ketippin. Qazylar quramynda bolǵan áriptesterim Bota Beısenova, Erkin Shúkimanovtar ýáde boıynsha ákelgen syılyqtaryn tabystap jatqanda, syılyq almaǵanym esime túsip yńǵaısyz jaǵdaıǵa tap boldym»,- deıdi ánshi.
Alaıda, Merýert hanym tyǵyryqtan bylaısha jol taýypty. «Saıysta ózime unaǵan bir qyz bar edi. Soǵan syılyq beremin dep oılap qoıǵanmyn. Sol qyzǵa esh oılanbastan qulaǵymdaǵy altyn syrǵamdy sheship berip, aq tilegimdi jetkizdim. Halyq ta ań-tań bolyp, barlyǵy shapalaqtaı bastady»,- dep bala ónerpazdyń keýdesin kernegen qýanyshty bizben bólisti.
Merýertten altyn syrǵa syıǵa alǵan Іnjý Baqytkeldiqyzy 1-synyp oqýshysy. Án men bıdi serik etken ónerli óren Shámshiniń «Baqyt qushaǵynda» ánin oryndaǵan.
