Merýert Súleımenova kir tasyn kóterýden álem chempıony atandy - Aqmola oblysy
KÓKShETAÝ. QazAqparat - Aqmolalyq sportshy qyz Merýert Súleımenova kir tasyn kóterýden álem chempıony atandy.
Irlandııanyń astanasy Dýblın qalasynda ótken baıraqty jarysqa álemniń 39 elinen kelgen 700-ge jýyq sportshy qatysty. Onyń ishinde Qazaqstan quramasynyń sapynda Aqmola oblysy Astrahan aýdanynyń jasóspirimder men balalar sport mektebiniń tárbıelenýshisi 18 jastaǵy Merýert Súleımenova da boldy. Jerlesimiz 68 keli salmaqqa deıingi qyzdar arasynda ótken jarysta julqa kóterý tásili boıynsha jeńimpaz atandy.
«Merýert 24 keli kir tasyn 131 ret kóterdi», deıdi jattyqtyrýshysy Baqtııar Jumabekov. Sonymen qatar, ol qyzdyń ulttyq qurama sapynda bolǵan jalǵyz aqmolalyq sportshy ekenin atap ótti. Atalǵan dodada Qazaqstan quramasy jalpy komandalyq esep boıynsha aldyna reseılikterdy jiberip, ekinshi orynnan kórindi. Qazirgi kezde, álem chempıony Semeı qalasynda ótetin Respýblıka kkýbogyna daıyndyǵyn bastap ketti.
