Merýert Qazbekova medıtsınalyq qaldyqtarǵa qatysty problemany kóterdi

NUR-SULTAN. QazAqparat – «Aq jol» fraktsııasy atynan Ekologııa jáne Densaýlyq saýqtaý mınıstrlikterine depýtattyq saýal joldaǵan Májilis depýtaty Merýert Qazbekova medıtsınalyq qaldyqtar problemalaryn atady, dep habarlaıdy QazAqparat tilshisi.

Onyń sózine qaraǵanda, COVID-19-ǵa shaldyqqandardy emdeý kezinde paıdalanylǵan medıtsınalyq mekemelerden shyqqan qaldyqtar (qorǵanys kıimder, shprıts, bınt) erekshe qaýip tóndiredi.

«Álemdik tájirıbede medıtsınalyq qaldyqtardy joıý úshin órtteý nemese avtoklavtaý tártibi iske asyrylady. Qazaqstanda negizinen órtteý tásili qoldanylyp keledi. Alaıda atalǵan qyzmetke qatysty biryńǵaı talaptar men tarıfterdiń bolmaýy alańdatady», - dedi depýtat.

Sonymen qatar ol bul qaldyqtardy baqylaýsyz shyǵarý oqıǵalary kezdesip jatqanyn sóz etti. Mundaı is-qımyldar turǵyndar úshin qaýip tóndiretini anyq.

«Medıtsınalyq qaldyqtar da qaýipti ekenin túsinikti, sebebi olarda vırýs tasymaldaıtyn birneshe adamnyń bıomaterıaly jınalady. Osyǵan baılanysty «Aq jol» depýtattyq fraktsııasy Densaýlyq saqtaý jáne Ekologııa mınıstrlikterin kelip jatqan málimetterdi tekserýdi suraıdy. Bul turǵyda osy salany retke keltirip, qaýipti medıtsınalyq qaldyqtardy tasymaldaý men joıý talaptaryn buzǵany úshin jaýapkershilikti kúsheıtý kerek», - dedi M. Qazbekova.

Belgili bolǵandaı, «Aq jol» depýtattyq fraktsııasy óz tarapynan zańnamaǵa tıisti túzetýler engizý boıynsha bastama jasaýǵa daıyn.