Merkide jalǵyzbasty múgedek anaǵa aýyldastary asarlatyp úı salyp berdi
Merki aýdanynda «Asarlatyp úı salý jobasy» aıasynda taǵy da bir úı ıesine tapsyryldy. Bul joly Jambyl aýyldyq okrýginde jalǵyzbasty, 2-toptaǵy múgedek ana Mahıra Ámirqulova joba aıasynda baspanaly boldy.
Aýyl turǵyndary jumyla atsalysqan úı eńsesi bıik ári keń. Okrýg ákimi Erbol Baıbolsynov tamyz aıynda bastalǵan baspana aýyl turǵyndarynyń yntymaǵy men aýyzbirshiliginiń arqasynda bitkenin jetkizdi. Atsalysqandarǵa alǵys aıtty.
Qonys toıǵa arnaıy kelgen aýdan ákiminiń orynbasary Baqythan Ábjaparov, ardagerler keńesiniń tóraǵasy Qambar Imanálıev, aýyl qarııalary men jomarttyq jasaǵan azamattar izgi tilekterin aıtyp, úı ıesine júrekjardy lebizderin jaýdyrdy.
Okrýgi ákimi qurylys jumystaryna atsalysqan birqatar azamattardy materıaldyq turǵyda kómek qolyn sozyp, azamattyq tanytqany úshin alǵys hatpen marapattady. Alqyzyl lenta qıylyp, jańa baspana ıesi Mahıra Ámirqulovaǵa úıdiń kilti tabys etildi.
«Osy istiń uıymdastyrǵan aýyl ákimdigine jáne jumyla úı salyp bergen barlyq aýyldastaryma alǵysymdy aıtamyn. Ózim ekinshi toptaǵy múgedekpin. Mundaı úı salý maǵan arman edi. Qyzym eki balasymen menimen birge turady. Kúıeý balam qaıtys bolǵan. Qýanyshymdy sózben aıtyp jetkize almaımyn»,-deıdi qonys toı ıesi.
Aıta keteıik, Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda, Jambyl oblysy ákiminiń qoldaýymen elimiz boıynsha alǵash ret Jambyl óńirinde qolǵa alynǵan «Asarlatyp úı salý» jobasy iske asyrylyp jatyr. Jobanyń maqsaty – «Asar» dástúrin jańǵyrtý, halyqty bereke-birlikke bastaý. Baspanaǵa muqtaj otbasy aýyl aqsaqaldarynyń sheshimimen anyqtalady. Jobada basymdyq áleýmettik az qamtylǵan, múmkindigi shekteýli, kópbalaly otbasylarǵa beriledi.
Oblys boıynsha barlyǵy 123 úıdiń kiltin tabys etý josparlanǵan. Búgingi deıin kóptiń kómegimen salynǵan osymen 22 úı paıdalanýǵa berilip otyr. Qalǵan úılerdiń qurylysy qarqyndy júrgizilýde.
