Merkide lımon ósirýmen aınalysatyn turǵyn óziniń tájirıbesimen bólisti
Jalpy, Merki aýdanynda túrli daqyldar ósiretin 42 jylyjaı jyl on eki aı jumys isteýde. Biri qyzanaq, biri qııar, tipten qulpynaı ósirýdi de jetik meńgerip alǵan. Al Aqtoǵan aýylynyń turǵyny Danııar Ábdirazaq jylyjaıda qazaqstandyqtarǵa beıtanys lımon ósirýge bel býǵan.
Jas kásipker 2018 jyly jylyjaı salyp, onda qııar ósirýmen aınalysqan. Keıinnen kásibinen mol tabys tabýdy kózdep, erekshe daqyldy ósirýdi oılastyrady. Osylaısha lımon ósirýdi qolǵa ala bastaıdy.
Qııar ósirip otyrǵan jylyjaıynda qııar arasyna 25 túp lımon kóshetin egip, ony kútip, baptaý ádisterin meńgere bastaıdy. Qazirdiń ózinde lımonnan ónim alyp, aldaǵy ýaqytta búkil aımaqty óz ónimderimen qamtamasyz etýdi josparlaýda.
Jylyjaıda lımon ósirý ıdeıasy Danııarǵa Ońtústik Koreıada tájirıbeden ótkennen keıin keldi. Dál sol jerde ol jylyjaıda lımon ósirý qıyn emes ekenin alǵash ret kórdi.
«Shyǵyndar men kirister arasyndaǵy aıyrmashylyqty oılaı otyryp, men onyń paıdaly ekenin túsindim. Bizdiń aımaqtaǵy aýa raıy Koreıadaǵy jaǵdaıǵa óte uqsas. Jalǵyz aıyrmashylyq – onda jer ylǵaldylyǵy joǵary. Biraq bizde jer qunarly. Meniń malym bolǵandyqtan, arnaıy tyńaıtqyshtar qajet emes. Kóń men qarashirik ósimdikterdi qorektendirý úshin qolaıly. Ázirge 25 kóshet otyrǵyzdym. Olar Tashkentten ákelindi. Kóshet quny tórt jarym myń teńge. Men kásipkerlerlik basqarmasy arqyly ınnovatsııalyq joba retinde lımon ósirý jobasyn qorǵap, 2 jarym mıllıon qaıtarymsyz grant jeńip aldym. Osylaısha qajettilikterdiń barlyǵyn jasap aldym. Lımon birneshe jyldan keıin ǵana tolyq jemis bere bastaıdy. 2019 jyly bir aǵashtan bes-alty lımon aldym. Ázirge kóshetterdi baptaý kerek. Birneshe jyldan keıin aǵashtar tolyq jemis bere bastaıdy. Sol kezde ár tal 50-60 keli ónim beredi»,-deıdi Danııar Ábdirazaq.
Kásipker lımon aǵashtarynyń arasynda qııar ósirip otyr. Ol jylyjaıdy ustaýǵa jumsalatyn shyǵyndardyń kóp bóligin óteýge múmkindik beredi. Qııardy satyp jylyjaıdy jylytý úshin alǵan kómir, jaryqqa ketip jatqan shyǵyndar jaýyp otyr.
Danııardan úlgi alǵan aýdandaǵy tórt sharýa jylyjaı qurylysyn júrgizip, memlekettik qoldaýlardy tıimdi paıdalanyp, árqaısysy júz lımon kóshettin otyrǵyzyp qoıǵan.