Merkide klıentterdiń 75 mln teńgesin jymqyrǵan bank qyzmetkeri sottaldy
TARAZ. QazAqparat – Jambyl oblysynda da salymshylardyń qomaqty qarajatyn qoldy qylǵan burynǵy bank qyzmetker 6 jylǵa sottaldy, dep habarlaıdy QazAqparat tilshisi.
Jambyl oblysynyń Merki aýdanynda Almaty qalasynyń 42 jastaǵy turǵyny bank salymshysynyń aqshasyn alaıaqtyq jolmen ıemdengen. Alaıaq áıel bankte bólimshe dırektory bolyp jumys istegen jáne klıentterdiń aqsha jınaǵy týraly málimetti jaqsy bilgen. Bul týraly Jambyl oblystyq polıtsııa departamentiniń baspasóz qyzmeti habarlady.
2016 jyly banktiń bólimshe dırektory bop qyzmet istep júrgen kezinde kúdikti qor bırjasynda aqsha tabý syltaýymen salymshy áıeldiń biriniń senimine kirip, odan 100 000 dollar aqshasyn alǵan.
Bir aıdan keıin alaıaq atalǵan áıelge taǵy da habarlasyp, 30 000 dollar somasyn aldy. Ózine sengen áıeldiń banktegi shotynda qarajat qalmaǵanyn túsingen alaıaq sol kezde jábirlenýshiniń anasynyń shotyndaǵy jınalǵan 27 000 000 teńgeni sheship alýdy usynady.
Ol alynǵan somany kóbeıtip qaıtarýǵa ýáde berdi. Bunymen toqtap qalmaı, alaıaq banktiń salymshysy bolǵan jergilikti kásipkerdiń senimine kirip, daǵdyly ádetimen onyń 3 500 000 teńge somasyndaǵy aqshasyn ıemdengen, alǵan aqshany jaqyn arada paıyzymen qaıtarýǵa ýáde beredi.
«Árbir áreketin tek túbirtekpen istep otyrǵan. Áıel aqshanyń bıznesmenniń shotynda turǵanyn aıtyp sendiredi. Alaıda, eshteńeden kúdiktenbegen er adam eki aptadan keıin bankke kelip, shotynda aqsha joq ekenin kóredi» delingen PD habarlamasynda.
Atalǵan derek QR QK 190-babynyń 4-bóligi boıynsha tirkeldi.
Búginde Merki aýdanynyń aǵa tergeýshisi J.Seriktiń kásibıliginiń arqasynda alaıaqtyń is-qımyly tolyq ashylyp, kúdiktiniń kinási dáleldendi.
Sot úkimimen áıelge 6 jyl merzimge bas bostandyǵynan aıyrý, memlekettik organdarda, jergilikti ózin-ózi basqarý organdarynda jáne qarjy uıymdarynda uıymdastyrýshylyq-ókimdik fýnktsııalarǵa baılanysty laýazymdardy atqarý quqyǵynan 10 jyl merzimge aıyrý túrindegi jaza taǵaıyndalǵan.
