Merkide balalarǵa arnalǵan ońaltý jáne beıimdeý ortalyǵy ashyldy
TARAZ. QazAqparat - Jambyl oblysy Merki aýdanynda múmkindigi shekteýli balalarǵa arnalǵan ońaltý jáne beıimdeý ortalyǵy ashyldy, dep habarlaıdy QazAqparat.
Jańadan ashylǵan áleýmettik nysan 25 em alýshyǵa arnalǵan. Onda jeke ońaltý baǵdarlamasy boıynsha balalar kelip, em ala alady. Qazirgi tańda ortalyqta 20-dan astam jetkinshek arnaıy medıtsınalyq saraptamadan ótip, tegin em qabyldap jatyr desek, aldaǵy ýaqytta oryn sanyn 40 tósekke deıin kóbeıtý kózdelýde. Bul týraly ortalyq dırektory Klara Rakaeva aıtyp berdi.
Quny 52 mıllıon teńge bolatyn áleýmettik nysanda 29 maman jumys isteıdi. Ǵımarat ishi oıyn bólmesi, balanyń oı-sanasyn damytatyn oıynshyqtarmen toltyrylsa, dene shynyqtyrý bólmesi arnaıy qurylǵylarmen jabdyqtalǵan. Sondaı-aq munda erekshe balalardyń sensorlyq qabiletin jáne usaq qol motorıkasyn damytýǵa arnalǵan quraldar da bar.
«Endi shalǵaı oblys ortalyǵyna nemese ózge qalalarǵa barmaı-aq óz aýdanymyzda em qabyldaı alamyz. Bul bizge úlken kómek bolyp otyr. Balalarymyz osy jerde em alady. Massajy bar, tańerteń 8 jarymda alyp kelemiz, keshke 5-te alyp ketemiz. Balalarymyz da osy jerge kelgisi kelip turady» - deıdi aýdan turǵyny Aızada Baltamuratova.
Aıta keteıik, búginde aýdan boıynsha eki jarym myńnan asa múmkindigi shekteýli jan bolsa, olardyń 357-si - bir jarym jastan 18 jasqa deıingi sal aýrýy men qımyl tirek qozǵalysy damymaǵan jetkinshekter eken.
