Merki-Shý-Býrylbaıtal joly bıyl ashylady
TARAZ. QazAqparat – Merki-Shý-Býrylbaıtal jolyna aıryqsha kóńil bólinýde desek, onyń qurylys barysy oblys ákiminiń turaqty baqylaýynda. Aımaq basshysy Berdibek Saparbaevtyń Shý aýdanyna kezekti jumys sapary barysynda Merki men Shý arasyndaǵy toǵyz kópirge nazar aýdaryldy, - dep habarlaıdy QazAqparat tilshisi.
«Qazavtojol» RMK basshysy Aıjan Týǵanovanyń aıtýynsha, qazirgi tańda kópirler 70 paıyzǵa daıyn. Qyrkúıek aıyna qaraı olardyń qurylysy tolyǵymen aıaqtalýy tıis. Maýsymǵa deıin úzdiksiz jumys isteý úshin qajetti qurylys materıaldary jetkilikti.
Qurylysshylar joldyń bıyl ashylatynyn sendirdi. Munda jumysshylarǵa bólgish aralyqtardy ornatý, jaqyn mańdaǵy aýyldar men mal aıdaýǵa arnalǵan ótkelderdi salý sekildi jumystardy qatar atqarýǵa týra kelýde.
«Barlyq kópirler jaryqtandyrylýy kerek, jumysty jandandyryp, qurylysqa jergilikti turǵyndardy kóbirek tartý mańyzdy. Áleýmettik jaýapkershilik týraly da umytpaı, áleýmettik máselelerdi sheshýde jergilikti halyqqa barynsha qol ushyn sozyńyzdar, - dedi Berdibek Saparbaev.
Sondaı-aq, aýdan aýmaǵynda ornalasqan «Qazsýshar» RMK balansyndaǵy Tasótkel shaǵyn bógeti kúrdeli jóndeýdi talap etedi. 1940 jyldary salynǵan nysannyń tozyǵy jetken, kópir boıymen júretin adamdar men kólikter úshin qaýipti. Sonymen qatar, eki magıstraldyq kanal osy jerden bastaý alady desek, Olar – oń jaǵalaý jáne sol jaǵalaý kanaldary.
PÝID-2 jobasyna keletin bolsaq, «NTF Insaat Ticoret Limited Sirketi» túrik kompanııasy ırrıgatsııalyq-drenaj jelisin qaıta qurý sharalaryn aıaqsyz qaldyrǵandyqtan, búginde tıisti jumystardy jergilikti «TarazStroıInvest» JShS qolǵa alǵan. Jumys qyzý júrýde, oblys ákiminiń tapsyrmasyna sáıkes 1 mamyrǵa deıin Andreevka, Podhoz jáne Gosfond kanaldaryn tazartý, qajet jerlerge naýalar ornatý jumystary aıaqtalýy tıis. Nátıjesinde Dýlat jáne Balýan Sholaq aýyldyq okrýgteriniń turǵyndary aldaǵy vegetatsııalyq kezeńde sýarý sýymen qamtamasyz etiletin bolady.
