Merki munaı bazasynda zardap shekkenderdiń biri qaıtys boldy
TARAZ. QazAqparat - Merki aýdanyndaǵy munaı bazasynda bolǵan órtten aýqymdy kúıik shalǵan úsh jumysshy Ortalyq aýdandyq aýrýhanaǵa jetkizilgen.
«Órt kezinde zardap shekken kásiporynnyń bas ınjeneri Sergeı Kımniń qaza tapqany habarlandy. Ózge eki jumysshynyń jaǵdaıy áli de aýyr, olar jan saqtaý bóliminde jasandy ókpe jeldetkish apparatymen jatyr», - dedi «QazAqparat» HAA tilshisine oblystyq densaýlyq saqtaý basqarmasynyń baspasóz hatshysy Tolqyn Ómirbaeva.
Esterińizge salamyz, 22 qyrkúıek kúni 18:30-da Merki aýdanynyń ortalyǵy Merke aýylynda «Isabekov» JK munaı bazasy aýmaǵynda AI-92 benzıni quıylǵan 60 tonnalyq tsısterna órtke orandy. Jalyn 50 kýbtyq rezervýar men bos qoımaǵa taraǵan. Órt 19:50-de sóndirildi, oǵan munaı bazasynyń órtke qarsy qyzmeti men TJD «Órt sóndirý jáne avarııalyq-qutqarý qyzmeti» MM 35 adam jáne 6 tehnıka jumyldyryldy.
48, 47 jáne 40 jastaǵy zardap shekken úsh jumysshy óte aýyr jaǵdaıda Merki ortalyq aýdandyq aýrýhanasynyń jansaqtaý bólimine jetkizildi. Dárigerler olarǵa atmosferalyq jaraqat, barlyq deneniń 2,3,4 deńgeıde termııalyq kúıýi, kúıiktik shok, tynys joldarynyń 2-3 deńgeıde kúıýi jáne deneleriniń 90-100 paıyzǵa kúıýi dıagnozdaryn qoıdy.
Taraz qalasynan №2 qalalyq aýrýhanasynyń sanıtarlyq avıatsııa brıgadasy jiberildi. Alaıda, zardap shekkenderdiń aýyr jaǵdaıy eskerile otyryp, olardy oblys ortalyǵyna tasymaldamaı, qajetti protsedýralardy dárilik zattar, qan preparattary, arnaıy qural-jabdyqtary bar aýdandyq aýrýhanada jasaýǵa sheshim qabyldandy.
