«Merki» qaýmalynda qar barysy, úndi jaırasy jáne arqarlardyń sany artyp keledi
TARAZ. QazAqparat – Jambyl oblysyndaǵy Merki taýlaryn «Qyzyl kitapqa» engen qar barysy men úndi jaırasy sııaqty ań-qustar meken etýde. Qorý jáne kúzetý jumystarynyń nátıjesinde arqarlardyń da sany ósken, dep habarlaıdy QazAqparat tilshisi.
Aımaqta osydan eki jyl ǵana buryn «Merki» memlekettik tabıǵı qaýmaly qurylǵan bolatyn.
Búginde oǵan qarasty orman qory jerleri men Qyrǵyz Alataýy aýmaǵynda qorǵaý jáne kúzetý jumysy óz nátıjesin kórsete bastady.
Óńirimizde bury-sońdy bolmaǵan, «Qyzyl kitapqa» engen arqar, úndi jaırasy, túrkistan sileýsini, aqbas búrkit sekildi birqatar ań-qustar paıda bolyp, sany ósýde.
Munda qorý, kúzetý jumystarynyń barysynda alǵash ret qańtar aıynda 1 qar barysy men 23 arqar quljasynyń BUU baǵdarlamasy aıasynda arnaıy ornatylǵan fototuzaqqa túsip qalǵany belgili boldy.
Osyǵan baılanysty Almaty qalasyndaǵy zoologııa ınstıtýtynan arnaıy mamandar kelip, fototuzaq túsirilimderi boıynsha zerdeleý, zertteý jumystaryn júzege asyrǵan.
Nátıjesinde qaýmal aýmaǵyndaǵy taý qoınaýyn 4 birdeı qar barysy mekendeıtinine, sondaı-aq, úndi jaırasy da bar ekendigine kóz jetkizildi.
Atalmysh ınstıtýt mamandarynyń kúshimen Merkidegi bir ǵana taý shatqalynyń ózinen 40 bas arqar men 150 bastan astam taý eshkisiniń úıiri sýretke túsirildi.
Oblystyq orman sharýashylyǵy jáne janýarlar dúnıesi aýmaqtyq ınspektsııasynan alynǵan málimetke qaraǵanda, búginde qaýmal aýmaǵyndaǵy arqarlar 140, úndi jaırasy 8, qar barysy 8 basqa jetip otyr.
Byltyrǵy jyldan bastap oblys ákiminiń bastamasymen Merki aýdanynyń taýly aımaǵynda memlekettik óńirlik tabıǵı saıabaq qurý isi qolǵa alynǵany barshaǵa málim.
Búginde atalmysh jobanyń jaratylystaný-ǵylymı negizdemesi tolyqtaı jasalyp bitti.
Endi tabıǵı saıabaqtyń shekara-shegi belgilenip, tehnıkalyq-ekonomıkalyq negizdemesi aıasyndaǵy jumystar júzege asyrylý ústinde.
